വാർത്താ ചാനലുകൾ ഇത്രയും ഇല്ലാത്ത കാലത്ത്, തൽസമയ സംപ്രേഷണവും കുറവായിരുന്ന സമയത്ത് അതിലുപരി സമൂഹമാധ്യമ അക്കൗണ്ടുകൾ പിച്ച വെച്ച് തുടങ്ങുന്ന സമയത്ത്, മൊബൈൽ ക്യാമറകൾ അപൂർവ്വമായിരുന്ന കാലത്ത് വാർത്താ താരം ആയിരുന്ന വിവാദ സന്യാസി അന്തരിച്ചു.വിവാദനായകനായ സ്വയംപ്രഖ്യാപിത ആൾദൈവം സന്തോഷ് മാധവന് ഹൃദയസംബന്ധമായ അസുഖത്തെ തുടർന്ന് കൊച്ചിയിലെ സ്വകാര്യ ആശുപത്രിയിലായിരുന്നു അന്തരിച്ചത്. ചൊവ്വാഴ്ച രാത്രിയാണ് സന്തോഷ് മാധവനെ ആശുപത്രിയിൽ പ്രവേശിപ്പിച്ചത്. ബുധനാഴ്ച രാവിലെ 11.05-ഓടെയായിരുന്നു മരണം.
സ്വയം സന്യാസപരിവേഷം ചാര്ത്തിയ സന്തോഷ് മാധവന് ശാന്തീതീരം എന്ന സന്യാസാശ്രമം നടത്തുകയും ഒട്ടേറെ വഞ്ചനാക്കുറ്റങ്ങളില് അറസ്റ്റിലാകുകയും, കുട്ടികളെ ലൈംഗികമായി പീഡിപ്പിച്ച കേസുകളിലും പ്രതിയാവുകയും ചെയ്തിരുന്നു. വര്ഷങ്ങള് നീണ്ട ജയില്വാസത്തിന് ശേഷം പുറംലോകവുമായി അധികം ബന്ധമില്ലാതെയാണ് സന്തോഷ് മാധവന് ജീവിച്ചിരുന്നത്.
കട്ടപ്പനയിലെ ദരിദ്രകുടുംബത്തിലായിരുന്നു സന്തോഷിന്റെ ജനനം. കട്ടപ്പന ഇരുപതേക്കറില് പാറായിച്ചിറയില് മാധവന്റെയും തങ്കമ്മയുടെയും മകനായ സന്തോഷ് കട്ടപ്പന ഗവണ്മെന്റ് ഹൈസ്ക്കൂളില് നിന്നും പത്താം ക്ലാസ് പാസായി. പിന്നീട് നാടുവിടുകയായിരുന്നു. എറണാകുളത്തെ മരട് തുരുത്തി ക്ഷേത്രത്തില് ശാന്തിക്കാരനായി. ഇത് ജീവിതത്തില് വഴിത്തിരിവായി.
പണം തട്ടിച്ച് മുങ്ങിയ മലയാളിയെ തേടി അന്താരാഷ്ട്ര പോലീസായ ഇൻറർപോൾ റെഡ് കോർണർ നോട്ടീസ് പുറപ്പെടുവിച്ച വാർത്തയോടെയാണ് ഇയാളെ കുറിച്ചുള്ള വിവരങ്ങൾ പുറംലോകത്ത് ആദ്യമായി പ്രത്യക്ഷപ്പെടുന്നത്.
സ്വാമി അമൃതചൈതന്യ എന്ന പേരില് ആത്മീയ ജീവിതം നയിച്ച് വന്നിരുന്ന ഇദ്ദേഹത്തെ 40 ലക്ഷം രൂപ തട്ടിയെന്ന ദുബായ് ബിസിനസുകാരി സെറഫിന് എഡ്വിന് 2008 ല് നല്കിയ പരാതിയാണ് സന്തോഷ് മാധവന്റെ തട്ടിപ്പുകള് പുറംലോകം അറിഞ്ഞത്. പരാതിയുടെ അടിസ്ഥാനത്തില് പൊലീസ് അന്വേഷണം നടത്തിയതിനു ശേഷം അറസ്റ്റ് ചെയ്യുകയായിരുന്നു. ഇദ്ദേഹത്തിൻറെ വസതി പരിശോധിച്ച് പോലീസ് നിരവധി വിവരങ്ങൾ കണ്ടെത്തുകയും അത് ആഴ്ചകളോളം മാധ്യമങ്ങൾക്ക് വിരുന്നായിരുന്നു അക്കാലത്ത്, ആവശ്യമുള്ളതും ആവശ്യമില്ലാത്തതും പ്രചരിപ്പിക്കാൻ സമൂഹമാധ്യമ അക്കൗണ്ടുകൾ ഇല്ലായിരുന്നു എന്നതായിരുന്നു ഇക്കാലത്ത് നിന്നുള്ള ഏക വ്യത്യാസം.
കട്ടപ്പനയിലെ വെയർഹൗസിങ് ഡിപ്പോയിലെ ചുമട്ടുകാരന്റെ മകനായ സന്തോഷ്, സ്വാമി അമൃതചൈതന്യ ആയതിനു പിന്നിൽ ദൈവ വിളിയാണെന്നു വീട്ടുകാർ പറയുമ്പോൾ, അതിബുദ്ധിയാണ് ഇയാളെ കോടിക്കണക്കിനു രൂപയുടെ ആസ്തിയുടെ വളർച്ചയിലേക്കു വഴി തെളിച്ചതെന്നാണു പൊലീസ് കണ്ടെത്തിയത്. പഠനത്തിൽ വലിയ മികവ് കാട്ടാതിരുന്ന സന്തോഷ് ഇംഗ്ലിഷും ഉറുദുവും സംസാരിക്കുന്ന അമൃത ചൈതന്യ ആയതിനു വിവിധ ദേശങ്ങളിലൂടെയുള്ള ഊരുചുറ്റലും കാരണമായി. കട്ടപ്പന ഇരുപതേക്കർ പാറായിച്ചിറയിൽ മാധവന്റെയും തങ്കമ്മയുടെയും മകനായി ജനിച്ച സന്തോഷിന്റെ വിദ്യാഭ്യാസം വള്ളക്കടവു സെന്റ് ആന്റണീസ് സ്കൂളിലും കട്ടപ്പന ഗവ. ഹൈസ്കൂളിലുമായിരുന്നു
വിദ്യാഭ്യാസം കുറവാണെങ്കിലും ബുദ്ധി ഉപയോഗിച്ചാൽ എങ്ങനെയും പണം ഉണ്ടാക്കാം എന്ന് ലോകത്തിന് കാണിച്ചു കൊടുത്ത ഒരു വ്യക്തിയായിരുന്നു അദ്ദേഹം, സമ്മതിക്കേണ്ടിയിരിക്കുന്നു.പത്താം ക്ലാസ് തോറ്റതോടെ പഠനം നിർത്തി. പിന്നീടു കട്ടപ്പനയിൽ ചെരുപ്പുകടയിൽ സെയിൽസ്മാനായി ജോലി നോക്കി. പതിനെട്ടു വയസ്സായപ്പോൾ ജ്യേഷ്ഠ സഹോദരന്റെ സഹായത്തിൽ കലൂരിലുള്ള ക്ഷേത്രത്തിൽ പരികർമിയായി. ഇവിടെനിന്നു പൂജാവിധികൾ അഭ്യസിച്ചശേഷം തൃപ്പൂണിത്തുറ തുരുത്തിയിലുള്ള ക്ഷേത്രത്തിൽ മേൽശാന്തിയായി ജോലിയിൽ പ്രവേശിച്ചു. ഇവിടെനിന്നാണു വളർച്ചയുടെ ആരംഭം. തുരുത്തി ക്ഷേത്രത്തിൽ സേവനം ചെയ്യുമ്പോൾ ജ്യോതിഷത്തിലൂടെയും മറ്റും ലക്ഷങ്ങൾ സമ്പാദിച്ചു. ഗൾഫു നാടുകളടക്കം വിവിധ സ്ഥലങ്ങളിലും സന്ദർശനം നടത്തി. ഈ കാലയളവിനുള്ളിൽ പ്രമുഖ വ്യക്തികളുമായി സൗഹൃദം സ്ഥാപിച്ചു. വീടിനു സമീപത്തുതന്നെയുള്ള പെൺകുട്ടിയെയാണു സന്തോഷ് പ്രണയിച്ചു വിവാഹം കഴിച്ചത്. വിവാഹത്തിനുശേഷം ഇയാളോടൊപ്പം പോയ പെൺകുട്ടി ഒന്നര മാസത്തിനുശേഷം ബന്ധം വേർപെടുത്തി തിരിച്ചെത്തി.
തുരുത്തി ക്ഷേത്രത്തിൽ മേൽശാന്തിയായി ജോലി നോക്കുന്നതിനിടയിൽ ഒരു ദിവസം സ്വാമി അവിടെനിന്ന് അപ്രത്യക്ഷമായി. പിന്നീടു മൂന്നു വർഷത്തോളം വീട്ടുകാർക്കും നാട്ടുകാർക്കും വിവരങ്ങളൊന്നും ലഭിച്ചിരുന്നില്ല. വടക്കേ ഇന്ത്യയിലെ ഏതോ ആശ്രമത്തിൽ ആയിരുന്നുവെന്നു മാത്രമാണു വീട്ടുകാർക്കു ലഭിച്ച വിവരം. പിന്നീടാണു സ്വാമി അമൃത ചൈതന്യ എന്നപേരിൽ പ്രത്യക്ഷനായത്. ഇതിനിടെ, ടൗണിൽതന്നെ പ്രവർത്തിക്കുന്ന കോടികൾ വില മതിക്കുന്ന ബഹുനില കെട്ടിടം ഇയാൾ വിലയ്ക്കു വാങ്ങിയിരുന്നു. സ്വത്തു വിവരങ്ങളെ സംബന്ധിച്ചു കട്ടപ്പന പൊലീസ് നേരത്തേ അന്വേഷണം നടത്തിയിരുന്നുവെങ്കിലും സ്വാമിയുടെ വിവാഹദിവസമാണ് അന്വേഷണത്തിനായി പൊലീസ് വീട്ടിലെത്തിയത്. സിനിമാ താരങ്ങൾ ഉൾപ്പെടെയുള്ള പ്രമുഖർ വിവാഹത്തിൽ പങ്കെടുക്കാൻ കട്ടപ്പനയിൽ എത്തിയിരുന്നു.
ലക്ഷങ്ങള് തട്ടിയെന്ന് ആരോപിച്ച് വിദേശ മലയാളി ആദ്യം പരാതി നല്കി. നഗ്നപൂജയെന്ന പേരില് പ്രായപൂര്ത്തിയാകാത്ത പെണ്കുട്ടികളെ അടക്കം സന്തോഷ് മാധവന് ലൈംഗികമായി പീഡിപ്പിച്ചിരുന്നതായും പരാതി ഉയർന്നു. ഇയാളുടെ ഫ്ലാറ്റില്നിന്നു ലഹരിവസ്തുക്കളും കടുവാത്തോലും പിടിച്ചെടുത്തിട്ടുണ്ട്. പെണ്കുട്ടികളെ ലൈംഗികമായി പീഡിപ്പിച്ച ദൃശ്യങ്ങളടങ്ങിയ സിഡികൾ ഉൾപ്പെടെ കണ്ടെടുത്തതു കേസിൽ നിര്ണായക തെളിവായി. പൂജപ്പുര സെന്ട്രല് ജയിലില് സന്തോഷ് മാധവന് വിഐപി പരിഗണന ലഭിച്ചതും വിവാദമായി. ജയിലിലും ‘പൂജാരി’യാകാന് ഇയാൾ ശ്രമിച്ചു.
ജയിലില് 'പൂജാരി'യാകാന് സന്തോഷ് ശ്രമങ്ങള് നടത്തിയെന്നായിരുന്നു വിവരം. ജയിലില് നിരന്തരം പൂജകള് ചെയ്യുന്നതായും ജയില് ഉദ്യോഗസ്ഥര് അടക്കമുള്ളവര് പൂജയ്ക്കായി സഹായങ്ങള് ചെയ്യുന്നതായും റിപ്പോര്ട്ടുകളുണ്ടായിരുന്നു. ഡോക്ടറുടെ സഹായി എന്നതായിരുന്നു ഏറെക്കാലം ജയിലില് സന്തോഷ് മാധവന്റെ ജോലി. ഈ അവസരം മുതലെടുത്ത് പലര്ക്കും ഇയാള് ചികിത്സ നിഷേധിച്ചിരുന്നതായും ജയിലിലായിരിക്കെ ഭൂമി ഇടപാടുകളടക്കം നടത്തിയിരുന്നതായും ആരോപണങ്ങളുണ്ടായിരുന്നു. സര്ക്കാര് മിച്ചഭൂമി സന്തോഷ് മാധവന്റെ കമ്പനിക്ക് വിട്ടുനല്കിയതിലും വിവാദങ്ങളുണ്ടായി.
2009 മേയ് 20-ന് എറണാകുളം അഡീഷണല് സെഷന്സ് കോടതി സന്തോഷ് മാധവനെ പ്രായപൂര്ത്തിയാകാത്ത പെണ്കുട്ടികളെ പീഠിപ്പിച്ചു എന്ന കേസില് 16 വര്ഷത്തെ തടവിനു ശിക്ഷിച്ചു. രണ്ടു കേസുകളിലായി 8 വര്ഷം വീതം തടവും 2,10,000 രൂപ പിഴയും ആണ് കോടതി വിധിച്ചത്. ഇയാളുടെ ഫ്ലാറ്റ് പരിശോധിച്ചപ്പോള് കടുവത്തോല് ലഭിച്ചതിന്റെ പശ്ചാത്തലത്തില് വനസംരക്ഷണ നിയമപ്രകാരവും കേസെടുത്തിട്ടുണ്ട്. പിന്നീട് ചില കേസുകളിൽ നിന്ന് ഇദ്ദേഹത്തെ കുറ്റവിമുക്തനാക്കിയിട്ടുണ്ട്.