വലിയ യാനങ്ങള് എന്നിവ തടസമില്ലാതെ കടന്നുപോകുന്നതിന് നടുവില് ബോസ്ട്രിങ് ആര്ച്ച് മാതൃകയിലാണ് (Perumbalam Bridge ) പാലം നിര്മ്മിച്ചിരിക്കുന്നത്.
ആലപ്പുഴ ജില്ലയിലെ പെരുമ്പളം ദ്വീപ് നിവാസികളുടെ ചിരകാല സ്വപ്നമായ പെരുമ്പളം പാലം യാഥാർഥ്യത്തിലേക്ക്. അന്തിമഘട്ട പ്രവൃത്തികൾ പൂർത്തിയാക്കി ഏപ്രിൽ മാസത്തോടെ പാലം തുറന്നുകൊടുക്കാനുള്ള ഒരുക്കങ്ങള് അതിവേഗം പുരോഗമിക്കുകയാണ്. പാലം ഗതാഗതസജ്ജമാകുന്നതോടെ നാലുവശവും വേമ്പനാട് കായലിനാല് ചുറ്റപ്പെട്ട ദ്വീപ് നിവാസികളുടെയും മറ്റാവശ്യങ്ങള്ക്കായി ഇവിടെ എത്തുന്നവരുടെയും വർഷങ്ങളായുള്ള യാത്രാദുരിതത്തിന് പരിഹാരമാകും. കായലിന് കുറുകെ നിർമിക്കുന്ന സംസ്ഥാനത്തെ ഏറ്റവും നീളമേറിയ പാലമാണ് പെരുമ്പളം പാലം.
രണ്ടു കിലോമീറ്റർ വീതിയും അഞ്ചു കിലോമീറ്റർ നീളവും ആറ് ചതുരശ്ര കിലോമീറ്റർ വിസ്തൃതിയുമുള്ള ദ്വീപിലെ ജനസംഖ്യ 12,000 ആണ്. 3000ത്തില് താഴെ വീടുകള് മാത്രമുള്ള ദ്വീപിലേക്ക് കിഫ്ബി മുഖേന 100 കോടി രൂപ ചെലവഴിച്ചാണ് പാലം നിർമിക്കുന്നത്. പാലം നിര്മാണത്തിന് വേണ്ടിവരുന്ന ഭീമമായ തുകയേക്കാള് ദ്വീപ് ജനത മറുകരയിലെത്താൻ വർഷങ്ങളായി അനുഭവിക്കുന്ന കഷ്ടപ്പാടുകൾക്ക് മുൻതൂക്കം നൽകി സംസ്ഥാന സര്ക്കാര് കരുതലോടെയുള്ള സമീപനം സ്വീകരിക്കുകയായിരുന്നു. 2019ല് മുഖ്യമന്ത്രി പിണറായി വിജയൻ നേരിട്ടെത്തി പാലത്തിന്റെ നിര്മാണോദ്ഘാടനം നിര്വഹിച്ചു. മുൻ എംപി എഎം ആരിഫും മുൻ പൊതുമരാമത്ത് വകുപ്പ് മന്ത്രി ജി സുധാകരനും പാലത്തിനായി വലിയ ഇടപെടലുകള് നടത്തിയിരുന്നു.
ദേശീയ ജലപാത കടന്നുപോകുന്ന ഭാഗമായതിനാല് ബാര്ജ്, വലിയ യാനങ്ങള് എന്നിവ തടസമില്ലാതെ കടന്നുപോകുന്നതിന് നടുവില് ബോസ്ട്രിങ് ആര്ച്ച് മാതൃകയിലാണ് പാലം നിര്മ്മിച്ചിരിക്കുന്നത്.
കരയിലെ രണ്ട് തൂണുകള് അടക്കം 34 തൂണുകളിലാണ് പാലം നിലയുറപ്പിക്കുന്നത്. 1157 മീറ്റര് നീളവും 11 മീറ്റര് വീതിയുമുള്ള പാലത്തില് രണ്ട് വരി ഗതാഗതത്തിന് യോഗ്യമായ 7.5 മീറ്റര് വീതിയുള്ള പാതയും ഇരുവശങ്ങളിലും 1.5 മീറ്റര് വീതമുള്ള നടപ്പാതയുമുണ്ട്.
പാലത്തിന്റെ സ്ട്രക്ചര് ജോലികളെല്ലാം പൂര്ത്തിയാക്കിക്കഴിഞ്ഞു.ചേര്ത്തല- അരൂക്കുറ്റി റോഡില് നിന്നും പെരുമ്പളം ദ്വീപ് വഴി വൈക്കം-പൂത്തോട്ട- തൃപ്പൂണിത്തുറ സംസ്ഥാന പാതയെ ബന്ധിപ്പിക്കുന്നതിന്റെ ആദ്യഘട്ടമെന്ന നിലയിലാണ് പെരുമ്പളം പാലം വിഭാവനം ചെയ്തിരിക്കുന്നത്.