ബിഎസ്എന്‍എല്‍ ആണ് കൂടുതൽ സമയം നൽകുന്നത്.
രണ്ട് സിം കാര്‍ഡ് ഉപയോഗിക്കുന്നവരാണെങ്കില്‍ രണ്ട് സിമ്മും ആക്ടീവായി നിലനിര്‍ത്താന്‍ മാസന്തോറും വലിയ തുക റീചാര്‍ജ് ചെയ്യേണ്ടി വരും. റീചാര്‍ജ് ചെയ്യാതെ 90 ദിവസമാണ് സിം കാര്‍ഡുകള്‍ ആക്ടീവായി നിലനിര്‍ത്താന്‍ സാധിക്കുക. തുടര്‍ന്നും സിം കാര്‍ഡ് നിലനിര്‍ത്താന്‍ 20 രൂപ മതിയാകും എന്നാണ് ട്രായ് പറയുന്നത്.
ദീര്‍ഘകാലമായി ഉപയോഗിക്കാതിരിക്കുന്ന പ്രീപെയ്ഡ് സിം കാര്‍ഡുകള്‍ പ്രവര്‍ത്തനരഹിതമാക്കുന്നത് സംബന്ധിച്ച മാനദണ്ഡങ്ങളില്‍ ട്രായ് ( ടെലികോം റെഗുലേറ്ററി അതോരിറ്റി ഓഫ് ഇന്ത്യ) വ്യക്തത വരുത്തി. മിനിമം ബാലന്‍സുണ്ടെങ്കില്‍ സിം പ്രവര്‍ത്തനരഹിതമാക്കുന്നത് തടയുന്നത് സംബന്ധിച്ച നിയന്ത്രണം ട്രായ് മുന്നോട്ടുവച്ചിട്ട് പത്തുവര്‍ഷത്തില്‍ കൂടുതലായിട്ടുണ്ട്. അക്കൗണ്ടില്‍ മിനിമം ബാലന്‍സ് ആയ 20 രൂപ നിലനിര്‍ത്തി സിം ഉപയോക്താക്കള്‍ക്ക് സിം സജീവമായി നിര്‍ത്താന്‍ സാധിക്കും. നേരത്തേ സിം സജീവമായി നിലനിര്‍ത്തുന്നതിനായി ഒരു നിശ്ചിത തുകയ്ക്ക്(ഏകദേശം 199 രൂപ) ഉപയോക്താക്കള്‍ സിം റീച്ചാര്‍ജ് ചെയ്യേണ്ടതുണ്ടായിരുന്നു. എന്നാല്‍ ഈ നിയമം അത്തരത്തില്‍ തുടര്‍ച്ചയായി റീച്ചാര്‍ജ് ചെയ്യേണ്ടതിന്റെ ആവശ്യകതയില്ലെന്ന് വ്യക്തമാക്കുന്നതാണ്.
ജിയോ, എയര്‍ടെല്‍, വിഐ എന്നിവയുടെ സിം കാര്‍ഡുകള്‍ റീചാർജ് ചെയ്യാതെ 90 ദിവസും ആക്ടീവായിരിക്കും. എയര്‍ടെല്‍ 90 ദിവസത്തിന് ശേഷം 15 ദിവസത്തേക്ക് ഗ്രേസ് പിരിയഡ് അനുവദിക്കുന്നുണ്ട്. ഏറ്റവും കൂടുതല്‍ സമയം നല്‍കുന്നത് ബിഎസ്എന്‍എല്‍ ആണ്. റീചാര്‍ജില്ലാതെ 180 ദിവസം ബിഎസ്എന്‍എല്‍ സിം ആക്ടീവായിരിക്കും. ശേഷം സിം നമ്പര്‍ മറ്റൊരാള്‍ക്ക് അനുവദിക്കും.
മിനിമം ബാലന്‍സ് നിലനിര്‍ത്തിയാല്‍ സിം കാര്‍ഡ് ഡിആക്ടീവ് ആകില്ലെന്നാണ് ട്രായ് നിയമം പറയുന്നത്. സിം കാര്‍ഡില്‍ 20 രൂപയില്‍ കുറയാത്ത ബാലന്‍സ് ഉണ്ടെങ്കില്‍ സിം കാര്‍ഡ് ആക്ടിവായി നിലിനിര്‍ത്താം. 11 വര്‍ഷം മുന്‍പ് ട്രായ് പുറത്തിറക്കിയ ഭേദഗതി പ്രകാരമാണ് ഉപഭോക്താക്കള്‍ക്ക് ഈ സേവനം ലഭ്യമാകുക.
എന്താണ് ട്രായുടെ 20 രൂപ നിയമം :
നിങ്ങള്‍ സിം കാര്‍ഡ് 90 ദിവസത്തേക്ക് കോള്‍, മെസേജ്, ഡേറ്റ, മറ്റു ആവശ്യങ്ങള്‍ എന്നിവയ്ക്കായി ഉപയോഗിക്കുന്നില്ലെങ്കില്‍ സിം പ്രവര്‍ത്തന രഹിതമാകും.
എന്നിരുന്നാലും നിങ്ങളുടെ അക്കൗണ്ടില്‍ 20 രൂപയില്‍ കൂടുതല്‍ ഉണ്ടെങ്കില്‍ 90 ദിവസത്തിന് ശേഷം ഈ 20 രൂപ നിങ്ങളുടെ അക്കൗണ്ടില്‍ നിന്ന് സ്വയമേവ കുറയ്ക്കുകയും സിം അടുത്ത 30 ദിവസത്തേക്ക് കൂടി പ്രവര്‍ത്തനക്ഷമമാകുകയും ചെയ്യും.
നിങ്ങളുടെ ഫോണില്‍ 20 രൂപയുടെ ബാലന്‍സ് ഉള്ളിടത്തോളം കാലം ഇത് തുടര്‍ന്നുപോകും.
നിങ്ങളുടെ ബാലന്‍സ് 20ല്‍ കുറയുന്നതോടെ സിം സ്വാഭാവികമായി പ്രവര്‍ത്തനരഹിതമാകുകയും ചെയ്യും.
അഥവാ പ്രവര്‍ത്തനരഹിതമാവുകയാണെങ്കില്‍ 15 ദിവസങ്ങള്‍ക്കുള്ളില്‍ 20 രൂപ റീച്ചാര്‍ജ് ചെയ്തുകൊണ്ട് വീണ്ടും സിം പ്രവര്‍ത്തനക്ഷമമാക്കുന്നതിന് സാധിക്കും.
പ്രീപെയ്ഡ് ഉപഭോക്താക്കൾക്ക് മാത്രമാണ് ഈ സേവനം ലഭ്യമാകുക.സൗജന്യ ഫോണ്‍ കോള്‍ ലഭിക്കുന്നതിനാല്‍ ഉപഭോക്താക്കള്‍ ഭൂരിഭാഗവും മെയിന്‍ അക്കൗണ്ട് റീചാര്‍ജ് ചെയ്യാറുണ്ടായിരുന്നില്ല. അതിനാല്‍ മാസന്തോറും 199 രൂപയോളം ചെലവാക്കി വേണം അക്കൗണ്ട് ആക്ടീവായി നിലനിര്‍ത്താന്‍. ട്രായ്‍യുടെ പുതിയ നിയമ ഭേദഗതിയാണിതെന്ന മട്ടില്‍ മാധ്യമ വാര്‍ത്തകള്‍ വന്നതിന് പിന്നാലെ ട്രായ് ഇക്കാര്യത്തില്‍ വ്യക്തവരുത്തുകയും ചെയ്തത്.