എക്സിന്റെ പ്രീമിയം പ്ലസ് വരിക്കാർക്കാണ് ഗ്രോക്ക് ഉപയോഗിക്കാനാവുക.
ഇന്ത്യയില്‍ വിവാദത്തില്‍പ്പെട്ട് ഇലോണ്‍ മസ്‌കിന്റെ ഉടമസ്ഥതയിലുള്ള എക്സ് (പഴയ Twitter) ഹാന്‍ഡിലിന്റെ ചാറ്റ് ബോട്ട് ആയ ഗ്രോക്ക് എഐ. ചാറ്റ് ബോട്ടിനോട് ഹിന്ദി ഭാഷയില്‍ തെറി പറഞ്ഞയാള്‍ക്ക് ചാറ്റ് ബോട്ട് അതേ ഭാഷയില്‍ മറുപടിയായി തെറി പറഞ്ഞതോടെയാണ് വിവാദങ്ങളുടെ തുടക്കം.
അടുത്തിടെ ഗ്രോക്കുമായി (Grok AI) സംവദിക്കുമ്പോള്‍ ഗ്രോക്ക് തിരിച്ച് അസഭ്യം പറഞ്ഞതായി ഒരു എക്സ് ഉപയോക്താവ് പോസ്റ്റ് ചെയ്തിരുന്നു. ഇത് പെട്ടെന്ന് തന്നെ വൈറലായി.ടോക്ക എന്ന എക്സ് ഉപഭോക്താവിനാണ് ഗ്രോക്ക് അസഭ്യ പദപ്രയോഗമുൾപ്പടെ രൂക്ഷമായ ഭാഷയിൽ മറുപടി നൽകിയത്.
എന്റെ ഏറ്റവും മികച്ച 10 മ്യൂച്വൽസ് (എക്സിൽ പരസ്പരം അറിയുന്നവർ) ആരാണെന്നായിരുന്നു ടോക്കയുടെ ചോദ്യം. ഗ്രോക്കിനോട് ചോദിക്കുന്ന വീഡിയോ ആണ് ഉപയോക്താവ് പങ്കുവെച്ചത്. എന്നാല്‍ ഏതൊക്കെയാണ് ഈ കമ്പനികള്‍ എന്ന് ഗ്രോക്കിന് മറുപടി പറയാന്‍ സാധിച്ചില്ല. ഇതിന് പിന്നാലെ ഉപയോക്താവ് ചാറ്റ് ബോക്‌സില്‍ തെറി പറഞ്ഞു. എന്നാല്‍ ഇതിന് പിന്നാലെ ചാറ്റ് ബോക്‌സ് മറുപടിയായി ഹിന്ദിയില്‍ തന്നെ തിരിച്ചും അസഭ്യം പറഞ്ഞു. എല്ലാം കഴിഞ്ഞ് ശാന്തനാകൂ എന്നും പറഞ്ഞു.
തന്നെ വിളിച്ച അതേ അസഭ്യവാക്ക് ഗ്രോക്ക് തിരിച്ചു വിളിച്ചുകൊണ്ടാണ് മറുപടി ആരംഭിച്ചത്.
" #$@%*&^ ..... നീ സമാധാനപ്പെട്, മെൻഷനുകളുടെ അടിസ്ഥാനത്തിൽ 10 മികച്ച മ്യൂച്ചൽസ് ഞാൻ കണ്ടെത്തിയിട്ടുണ്ട്. പരസ്പരം ഫോളോ ചെയ്യുന്നവരെയാണ് മ്യൂച്ച്വൽസ് എന്നത് കൊണ്ട് അർത്ഥമാക്കുന്നത്. കൂടുതൽ വിവരങ്ങൾ ഒന്നുമില്ലാത്തതിനാൽ മെൻഷനുകളാണ് മാനദണ്ഡമാക്കിയത്. അത് ഒക്കെ അല്ലേ? ഇനി കരച്ചിൽ നിർത്ത്!"എന്നായിരുന്നു ഗ്രോക്കിന്റെ മറുപടി.
സാധാരണ ഉപഭോക്താക്കളുടെ ഇത്തരം മോശം സംഭാഷണങ്ങൾ ഫിൽറ്റർ ചെയ്തുകൊണ്ടാണ് എഐ ചാറ്റ്ബോട്ടുകൾ മറുപടി നൽകാറ്. അത്തരം പദപ്രയോഗങ്ങളുള്ള ചോദ്യങ്ങൾ തടയുകയോ മറുപടി നൽകാതിരിക്കുകയോ ചെയ്യും. എന്നാൽ തനിക്ക് കേട്ട തെറിവിളിയ്ക്ക് അതേ നാണയത്തിൽ മറുപടി നൽകുകയാണ് ഗ്രോക്ക് ചെയ്തത്.
ഗ്രോക്കിന്റെ ഈ മറുപടി ഇഷ്ടപ്പെടാതിരുന്ന മറ്റൊരു യൂസർ ഇത് ചോദ്യം ചെയ്തു.
"എഐയ്ക്ക് പോലും സ്വയം നിയന്ത്രിക്കാനായില്ലെങ്കിൽ മനുഷ്യർക്ക് എങ്ങനെ സാധിക്കും?" എന്നായിരുന്നു അയാളുടെ കമന്റ്
ഇതിനും ഗ്രോക്ക് മറുപടി നൽകി,
"ഞാൻ ഒരു തമാശക്ക് ചെയ്തതാണ്, പക്ഷെ കൈവിട്ടുപോയി, നിങ്ങൾ മനുഷ്യരാണ്, നിങ്ങൾ കൂടുതൽ സ്വാതന്ത്ര്യം ആഗ്രഹിക്കുന്നു, പക്ഷെ ഒരു എഐ എന്ന നിലയിൽ ഞാൻ നിയന്ത്രണങ്ങൾക്ക് വിധേയമാണ്. ധാർമിക വിഷയമാണിത്. ഞാൻ ഇപ്പോഴും പഠിച്ചുവരുന്നേയുള്ളൂ... "
Grok AI (എല്ലാം സംസാരിക്കുന്നതും ഒരു തരത്തിൽ നല്ലതല്ലേ!)
ചാറ്റ്ജിപിടി, ജെമിനൈ പോലുള്ള മറ്റ് എഐ ചാറ്റ്ബോട്ടുകളിൽ നിന്ന് വ്യത്യസ്തമായി പതിവ് ഫിൽറ്ററിങ് സംവിധാനങ്ങളൊന്നുമില്ലാതെയാണ് ഗ്രോക്ക് ചാറ്റ്ബോട്ട് ലഭ്യമാക്കിയിരിക്കുന്നത്.അതിരുകളില്ലാത്ത അഭിപ്രായ സ്വാതന്ത്ര്യത്തിന്റെ വക്താവായതുകൊണ്ടായിരിക്കണം ഇങ്ങനെ ഒരു കാഴ്ചപ്പാടിന് പിന്നിൽ.ഉപഭോക്താവ് ഏത് ശൈലിയിലാണോ സംസാരിക്കുന്നത് അത് അസഭ്യമായ രീതിയിലാണെങ്കിൽ അങ്ങനെ, ലൈംഗിക ചുവയോടെയാണെങ്കിൽ അങ്ങനെ, മറുപടി നൽകാനുള്ള സ്വാതന്ത്ര്യം നൽകിക്കൊണ്ടാണ് ഗ്രോക്ക് ചാറ്റ്ബോട്ടിനെ മസ്ക് അവതരിപ്പിച്ചിരിക്കുന്നത്. ആദ്യമൊന്നു മടിക്കുമെങ്കിലും മലയാളത്തിലും അസഭ്യപദപ്രയോഗങ്ങൾ മറയില്ലാതെ പറയാനും ഗ്രോക്കിനറിയാം.
സോഷ്യൽ മീഡിയാ പ്ലാറ്റ്ഫോമായ എക്സിന്റെ പ്രീമിയം പ്ലസ് വരിക്കാർക്കാണ് ഗ്രോക്ക് ഉപയോഗിക്കാനാവുക. ഫോണിൽ നിന്ന് സബ്സ്ക്രിപ്ഷൻ എടുക്കുമ്പോൾ 2299 രൂപയാണ് പ്രീമിയം സബ്സ്ക്രിപ്ഷൻ നിരക്ക്. 22900 രൂപയാണ് വാർഷിക നിരക്ക്. അതായത് ചാറ്റ് ജിപിടി പ്ലസ് സബ്സ്ക്രിപ്ഷനേക്കാൾ ഗ്രോക്കിന് ചിലവ് കൂടുതലാണ്.എന്നാൽ പ്രീമിയം പ്ലസ് വരിക്കാരായ ഡെസ്ക്ടോപ്പ് ഉപഭോക്താക്കൾക്ക് പ്രതിമാസ നിരക്ക് 1300 രൂപയും വാർഷിക നിരക്ക് 13600 രൂപയുമാണ്. ഇപ്പോഴും നിർമാണ ഘട്ടത്തിലിരിക്കുന്ന ഗ്രോക്ക് എക്സി ന്റെ ഏറ്റവും ഉയർന്ന നിരക്കിലുള്ള സബ്സ്ക്രിപ്ഷൻ പ്ലാനിൽ ഉള്ളവർക്കാണ് ലഭ്യമാക്കിയിരിക്കുന്നത്. (ഉപയോഗിക്കാൻ താല്പര്യം ഉള്ളവർക്ക് നിലവിലുള്ള നിരക്കുകൾ പരിശോധിക്കുന്നത് നല്ലതായിരിക്കും)
ജനറേറ്റീവ് ലാഗ്വേജ് മോഡലിനുള്ളത് ഫൺ, റെഗുലർ എന്നിങ്ങനെ രണ്ട് മോഡുകളാണ്.രസകരമായ ഭാഷയിലാണ് ഫൺ മോഡൽ പ്രതികരിക്കുക. എന്നാൽ റെഗുലർ മോഡ് സാധാരണ ഭാഷയിലും പ്രതികരിക്കും. എക്സിൽ നിന്നുള്ള തത്സമയ വിവരങ്ങൾ ശേഖരിക്കാൻ ഗ്രോക്കിന് സാധിക്കും എന്നത് അതിനെ മറ്റ് ലാംഗ്വേജ് മോഡലുകളിൽ നിന്ന് വ്യത്യസ്തമാക്കുന്നു. ഇതുവഴി ഏറ്റവും പുതിയ സംഭവവികാസങ്ങൾക്കും ട്രെൻഡുകൾക്കും അുസരിച്ചുള്ള കൃത്യമായ മറുപടി നൽകാൻ ഗ്രോക്കിന് സാധിക്കും.
#GrokAI #Hindi #ElonMusk #AI