കടൽ കടന്നെത്തിയ രണ്ട് പ്രണയഹൃദയങ്ങൾ വർക്കലയിൽ വെച്ച് ഒന്നായി. ഇംഗ്ലണ്ടിൽ നിന്നുള്ള ജോർജ് ഹാരിയും റഷ്യയിൽ നിന്നുള്ള അനസ്താഷയുമാണ് വർക്കല കുരയ്ക്കണ്ണി ഭദ്രാദേവി ക്ഷേത്രത്തിൽ(Varkala temple wedding) വെച്ച് കേരളീയ ആചാരപ്രകാരം വിവാഹിതരായത്. തീരദേശത്തിന്റെ ഭംഗിയും ക്ഷേത്രാചാരങ്ങളുടെ പവിത്രതയും ചേർന്ന വേദിയിൽ ഇവർ ദാമ്പത്യജീവിതത്തിലേക്ക് ചുവടുവെച്ചു.
രണ്ട് രാജ്യങ്ങൾ, രണ്ട് വ്യക്തിത്വങ്ങൾ, ഒരേയൊരു ലക്ഷ്യം; അത് യാത്രയായിരുന്നു. യാത്രകളോടുള്ള ആ തീവ്രമായ അഭിനിവേശമാണ് ജോർജിനെയും അനസ്താഷയെയും ഒരേ വഴിയിൽ എത്തിച്ചത്. നീണ്ടനാളത്തെ ആ പ്രണയയാത്രയ്ക്കൊടുവിൽ, സഞ്ചാരികളുടെ പറുദീസയായ വർക്കലയുടെ മണ്ണിൽ വെച്ച് അവർ ഒന്നിക്കാൻ തീരുമാനിച്ചു. ഇരുവഴികളിലായിരുന്ന അവരുടെ ജീവിതം ഇനി മുതൽ ഒരുമിച്ചുള്ള പ്രണയയാത്രയുടെ ഒറ്റവരിപ്പാതയാണ്.
കേരളത്തിന്റെ തനതായ ആചാരങ്ങളിലും ക്ഷേത്രങ്ങളുടെ പ്രശാന്തതയിലും ആകൃഷ്ടരായാണ് ജോർജും അനസ്താഷയും തങ്ങളുടെ വിവാഹവേദിയായി വർക്കല തിരഞ്ഞെടുത്തത്. ഇവരുടെ ആഗ്രഹത്തിന് പൂർണ്ണ പിന്തുണയുമായി കുരയ്ക്കണ്ണി കുറ്റിക്കാട് ഭദ്രാദേവി ക്ഷേത്ര കമ്മിറ്റിയും മുന്നിട്ടിറങ്ങിയതോടെ കല്യാണം അതിമനോഹരമായി നടന്നു.
"ഈ മലയാളി വിവാഹം ഞങ്ങൾക്ക് മറക്കാനാവാത്ത അനുഭവമാണ്," നവദമ്പതികൾ സന്തോഷം പങ്കുവെച്ചു. മധുവിധുവിനായി മാറ്റൊരിടം തേടിപ്പോകാതെ ദൈവത്തിന്റെ സ്വന്തം നാട്ടിൽ തന്നെ തുടരാനാണ് ഇവരുടെ തീരുമാനം. ഏതാനും ദിവസത്തെ വർക്കല വാസത്തിന് ശേഷം ഇവർ യാത്ര തിരിക്കും.(International couple Kerala marriage)