പുരുഷന്മാരെക്കാളും സ്ത്രീകൾ നിർമ്മിത ബുദ്ധിയെ കൂടുതൽ ജാഗ്രതയോടെയാണ് വീക്ഷിക്കുന്നത്.
സാങ്കേതിക ലോകത്തെ ഏറ്റവും വലിയ ചർച്ചാവിഷയമായി മാറിയിരിക്കുകയാണ് നിർമ്മിത ബുദ്ധി (Artificial Intelligence - AI) മനുഷ്യജീവിതത്തിൻ്റെ എല്ലാ മേഖലകളിലും വിപ്ലവകരമായ മാറ്റങ്ങൾ കൊണ്ടുവരുമെന്ന് (വലിയൊരു ശതമാനം) കരുതപ്പെടുന്ന AI-യെ ലോകം സ്വീകരിക്കുമ്പോഴും, അതിൽ ഒളിഞ്ഞിരിക്കുന്ന അപകടസാധ്യതകളെക്കുറിച്ച് ഗൗരവകരമായ ചില പഠന റിപ്പോർട്ടുകൾ പുറത്തുവരുന്നുണ്ട്. ഇതിൽ ഏറ്റവും ശ്രദ്ധേയമായ ഒന്നാണ് PNAS Nexus ജേണലിൽ പ്രസിദ്ധീകരിച്ച റിപ്പോർട്ട്. പുരുഷന്മാരെ അപേക്ഷിച്ച് സ്ത്രീകൾ AI സാങ്കേതികവിദ്യയെ കൂടുതൽ സംശയത്തോടെയും ജാഗ്രതയോടെയുമാണ് കാണുന്നതെന്ന് ഈ പഠനം വ്യക്തമാക്കുന്നു.
നോർത്ത് ഈസ്റ്റേൺ യൂണിവേഴ്സിറ്റിയിലെ (Northeastern University) ഗവേഷകയായ ബിയാട്രിസ് മാജിസ്ട്രോയും (Beatrice Magistro) സംഘവുമാണ് ഈ പഠനത്തിന് നേതൃത്വം നൽകിയത്. 2023 നവംബറിൽ യുണൈറ്റഡ് സ്റ്റേറ്റ്സിലും കാനഡയിലുമായി (United States and Canada)ഏകദേശം 3,000 ആളുകളെ പങ്കെടുപ്പിച്ചുകൊണ്ട് നടത്തിയ വിപുലമായ സർവേയാണിത്. ജനറേറ്റീവ് AI-യുടെ (Generative AI) ഗുണദോഷങ്ങളെക്കുറിച്ച് പൊതുജനങ്ങൾക്കിടയിലുള്ള ധാരണകൾ അളക്കുക എന്നതായിരുന്നു ഇതിൻ്റെ പ്രധാന ലക്ഷ്യം.
AI-യുടെ ഗുണങ്ങളേക്കാൾ കൂടുതൽ അതിൻ്റെ അപകടസാധ്യതകളാണോ എന്ന ചോദ്യത്തിന് സർവേയിൽ പങ്കെടുത്തവർ നൽകിയ ഉത്തരങ്ങൾ ഞെട്ടിക്കുന്നതായിരുന്നു. 1 മുതൽ 7 വരെയുള്ള സ്കെയിലിൽ പുരുഷന്മാർ ശരാശരി 4.38 സ്കോർ നൽകിയപ്പോൾ സ്ത്രീകൾ 4.87 എന്ന സ്കോറാണ് രേഖപ്പെടുത്തിയത്. അതായത്, പുരുഷന്മാരേക്കാൾ ഏകദേശം 11 ശതമാനം കൂടുതൽ സ്ത്രീകൾ AI-യെ സംശയത്തിന്റെ നിഴലിലാണ് വീക്ഷിക്കുന്നത് എന്ന് സാരം. സാങ്കേതികവിദ്യയെക്കുറിച്ചുള്ള അമിതമായ ശുഭാപ്തിവിശ്വാസമല്ല (AI Optimism), മറിച്ച് സൂക്ഷ്മമായ വിലയിരുത്തലാണ് സ്ത്രീകളിൽ പ്രകടമായത്.
ഗവേഷകർ കേവലം AI-യെക്കുറിച്ച് മാത്രമല്ല, ആളുകളുടെ പൊതുവായ അപകടസാധ്യത കൈകാര്യം ചെയ്യാനുള്ള മനോഭാവത്തെക്കുറിച്ചും പഠിച്ചു. ജീവിതത്തിൽ ഉറപ്പുള്ള ചെറിയ പ്രതിഫലങ്ങൾ തിരഞ്ഞെടുക്കണോ അതോ വലിയ നേട്ടത്തിനായി വലിയ റിസ്ക് എടുക്കണോ എന്ന പരീക്ഷണത്തിൽ സ്ത്രീകൾ കൂടുതൽ ജാഗ്രത പ്രകടിപ്പിച്ചു, പഠനം പറയുന്നു. അമിതമായ ആവേശം കാണിക്കാതെ, സുരക്ഷിതമായ വഴികൾ തിരഞ്ഞെടുക്കുന്ന ഈ പ്രവണതയാണ് AI-യോടുള്ള അവരുടെ സമീപനത്തിലും പ്രതിഫലിക്കുന്നത്.
സ്ത്രീകൾ AI-യെ ഭയപ്പെടുന്നതിന് പിന്നിൽ വ്യക്തമായ സാമൂഹികവും സാമ്പത്തികവുമായ കാരണങ്ങളുണ്ടെന്ന് പഠനം ചൂണ്ടിക്കാട്ടുന്നു. അതിന് കാരണമായി ചൂണ്ടിക്കാട്ടുന്നത് നിലവിൽ ലോകത്ത് നടപ്പിലാക്കിക്കൊണ്ടിരിക്കുന്ന പല യന്ത്രവൽകൃത പ്രക്രിയകളും സ്ത്രീകളുടെ തൊഴിലിനെയാണ് നേരിട്ട് ബാധിക്കുന്നത്.
ഭരണപരമായ ജോലികൾ ,കസ്റ്റമർ സർവീസ് തുടങ്ങിയ മേഖലകളിൽ സ്ത്രീകളുടെ പങ്കാളിത്തം കൂടുതലാണ്. ഈ മേഖലകളിലാണ് നിർമ്മിത ബുദ്ധി ഏറ്റവും കൂടുതൽ തൊഴിൽ നഷ്ടം ഉണ്ടാക്കാൻ സാധ്യതയുള്ളതും.
തങ്ങളുടെ തൊഴിൽ മേഖലയിൽ സാങ്കേതികവിദ്യ മൂലമുണ്ടാകുന്ന മാറ്റങ്ങൾ നേരിട്ട് അനുഭവിക്കുന്നതിനാലാണ് സ്ത്രീകൾക്ക് നിർമ്മിത ബുദ്ധിയെ കുറിച്ച് കൂടുതൽ ജാഗ്രത വേണ്ടിവരുന്നത്.
അതേസമയം AI-യുടെ നേട്ടങ്ങളെക്കുറിച്ച് ചോദിച്ചപ്പോൾ സ്ത്രീകൾ കൂടുതൽ അനിശ്ചിതത്വമാണ് പ്രകടിപ്പിച്ചത്. എ ഐ നിത്യജീവിതത്തിൽ വരുത്തുന്ന വലിയ മാറ്റങ്ങളെക്കുറിച്ച് അവർക്ക് വലിയ മതിപ്പില്ലായിരുന്നു. എന്നാൽ ഇതിലൊരു കൗതുകകരമായ വസ്തുതയുണ്ട് ഇതേ പഠനത്തിൽ തന്നെ. എ ഐ അധിഷ്ഠിതമായ സാങ്കേതികവിദ്യ ഉപയോഗിക്കുന്നത് വഴി ജീവനക്കാരുടെ ജോലിഭാരം കുറയുമെന്നോ അല്ലെങ്കിൽ അവർക്ക് വ്യക്തിപരമായ നേട്ടങ്ങൾ ഉണ്ടാകുമെന്നോ ഗവേഷകർ ഉദാഹരണസഹിതം വിശദീകരിച്ചപ്പോൾ സ്ത്രീകൾ പുരുഷന്മാരെപ്പോലെ തന്നെ അതിനെ പിന്തുണച്ചു. ഇതിനർത്ഥം പ്രായോഗികമായ ഗുണങ്ങൾ ബോധ്യപ്പെട്ടാൽ സ്ത്രീകൾ സാങ്കേതികവിദ്യയെ സ്വീകരിക്കാൻ തയ്യാറാണ് എന്നാണ്.
ഭാവിയിലേക്കുള്ള പാഠങ്ങൾ
ലിംഗപരമായ ആശങ്കകൾ പരിഗണിച്ചുകൊണ്ടുള്ള ഒരു എ ഐ നയം (AI Policy) ആവശ്യമാണെന്ന് ഗവേഷകർ വാദിക്കുന്നു.
1. അസമത്വം ഒഴിവാക്കുക : സാങ്കേതികവിദ്യ വികസിപ്പിക്കുമ്പോൾ പുരുഷന്മാരുടെ വീക്ഷണത്തിന് മാത്രം മുൻഗണന നൽകുന്നത് നിലവിലുള്ള സാമൂഹിക അസമത്വങ്ങൾ വർദ്ധിപ്പിക്കും.
2. പ്രതിരോധം കുറയ്ക്കുക : സ്ത്രീകളുടെ ആശങ്കകൾ പരിഗണിക്കാതെ AI അടിച്ചേൽപ്പിക്കുന്നത് ഈ സാങ്കേതികവിദ്യയോടുള്ള വലിയ ജനകീയ പ്രതിരോധത്തിന് കാരണമാകും.
3. ഉൾക്കൊള്ളൽ : നിർമ്മിത ബുദ്ധി വികസിപ്പിക്കുന്ന ഘട്ടത്തിൽ തന്നെ സ്ത്രീകളുടെ പങ്കാളിത്തവും കാഴ്ചപ്പാടുകളും ഉറപ്പാക്കേണ്ടത് അത്യാവശ്യമാണ്.
AI എന്നത് വെറുമൊരു സാങ്കേതിക വിദ്യയല്ല, അത് നമ്മുടെ സാമൂഹിക വ്യവസ്ഥിതിയെ മാറ്റിമറിക്കാൻ പോകുന്ന ഒന്നാണ്. അതുകൊണ്ട് തന്നെ, സമൂഹത്തിലെ പകുതിയോളം വരുന്ന സ്ത്രീകളുടെ ആശങ്കകളെ അവഗണിക്കുന്നത് വലിയ തിരിച്ചടികൾക്ക് കാരണമാകും. ഈ പഠനം നമുക്ക് മുന്നിൽ തുറന്നു വെക്കുന്നത് കേവലം ഭയമല്ല, മറിച്ച് കൂടുതൽ ഉത്തരവാദിത്തമുള്ളതും സുരക്ഷിതവുമായ ഒരു സാങ്കേതിക ഭാവി കെട്ടിപ്പടുക്കാനുള്ള ഓർമ്മപ്പെടുത്തലാണ്.
(ചിത്രം എ ഐ നിർമ്മിതം)