വിവാഹം നടത്തുക, വലിയ ജോലിയാണല്ലേ? അതിപ്പോൾ സാധാരണ ബ്രോക്കർമാരാണെങ്കിലും ശരി വലിയ വലിയ വെഡ്ഡിംഗ് പ്ലാനേഴ്സാണെങ്കിലും ശരി. വലിയ തുകയാണ് ഇവരെല്ലാം വാങ്ങുന്നത്. എന്നാൽ, വിവാഹം മുടക്കുന്നതിന് വേണ്ടി പതിനായിരങ്ങൾ വാങ്ങുന്ന ആളെ അറിയാമോ? അങ്ങനെയൊരു യുവാവുണ്ട് അങ്ങ് സ്പെയിനിൽ. പേര് ഏണസ്റ്റോ റെയിനേഴ്സ് വേരിയ. സംശയിക്കേണ്ട പണം കൊടുത്താല്‍ കല്യാണം മുടക്കിത്തരാനായി തയാറായി ഇറങ്ങിയിരിക്കുകയാണൊരു പ്രൊഫഷണല്‍ വെഡ്ഡിങ് ഡിസ്‌ട്രോയര്‍.
വധുവിനോ വരനോ കല്ല്യാണത്തിന് താത്പര്യമില്ലെങ്കില്‍ പണവുമായി വെഡ്ഡിങ് ഡിസ്‌ട്രോയറെ സമീപിച്ചാല്‍ മതിയാകും.തന്റെ സോഷ്യൽ മീഡിയാ അക്കൗണ്ട് വഴി ഏണസ്റ്റോ തന്നെയാണ് തന്റെ ജോലി വിവാഹം മുടക്കലാണ് എന്ന് തുറന്നു പറഞ്ഞിരിക്കുന്നത്. ഇങ്ങനെ, ഒരു വിവാഹം മുടക്കിയാൽ തനിക്ക് 500 യൂറോ വരെ കിട്ടും എന്നാണ് ഈ യുവാവ് പറയുന്നത്. അതായത് നമ്മുടെ 46,000 രൂപയ്ക്ക് മുകളിൽ വരും ഇത്. ചില വിവാഹങ്ങളിൽ വധുവിനോ വരനോ തീരെ താല്പര്യം കാണില്ല. എന്നാൽ, അവർക്കത് മുടക്കാനും സാധിക്കണം എന്നില്ല. അങ്ങനെയുള്ള അവസരങ്ങളിലാണ് ആളുകൾ തന്റെ സഹായം തേടിയെത്തുന്നത് എന്നാണ് ഏണസ്റ്റോ പറയുന്നത്.
അങ്ങനെ, ആളുകൾ വിവാഹം മുടക്കണമെന്നാവശ്യപ്പെട്ട് തന്റെ അടുത്തെത്തുമ്പോൾ താൻ എങ്ങനെ എങ്കിലും വിവാഹത്തിന് മുമ്പായി അത് മുടക്കുന്നു. അങ്ങനെ വിവാഹം മുടക്കുന്നതിലൂടെ വലിയ തുക തന്നെ താൻ സമ്പാദിക്കുന്നു എന്നും ഏണസ്റ്റോ പറയുന്നു. തന്നെത്തേടി വരനും വധുവും അടക്കം ഒരുപാട് പേരാണ് ഇങ്ങനെ വിവാഹം മുടക്കിക്കൊടുക്കണം എന്ന് ആവശ്യപ്പെട്ടുകൊണ്ട് വരുന്നത് എന്നും ഏണസ്റ്റോ പറയുന്നുണ്ട്. ഈ ഡിസംബര്‍ വരെ ഫുള്‍ തിരക്കിലാണെന്ന് വേരിയ പറയുന്നു.
ഇങ്ങനെ വിവാഹം മുടക്കുന്നത് കൊണ്ട് നല്ലതേ സംഭവിക്കൂ എന്നാണ് ഏണസ്റ്റോയുടെ പക്ഷം. തീർന്നില്ല, വെറുതെ ചെന്ന് വിവാഹം മുടക്കാൻ ആണെങ്കിൽ ചിലപ്പോള്‍ വരന്റെയോ വധുവിന്റെയോ കാമുകിയോ കാമുകനോ ആയി വേരിയ എത്തും. പണം നല്‍കിയ ആളെ വിളിച്ച് സ്ഥലം വിടും. കുടുംബാംഗങ്ങള്‍ ഇടപെട്ടാല്‍ നല്ല ഇടിയും കൊടുക്കും. അവിടെ വച്ച് തല്ല് കിട്ടുക, ഇടി കിട്ടുക, പരിക്കേൽക്കുക ഇതെല്ലാം സംഭവിച്ചാൽ വേറെയും തുക അഡീഷണലായി കിട്ടും. ഓരോ അടിക്കും 50 യൂറോയാണ് താൻ വാങ്ങുന്നത് എന്നാണ് ഏണസ്റ്റോ പറയുന്നത്. അതായത്, ഏകദേശം 4664 രൂപ വരും ഇത്.
നിശ്ചയിച്ച വിവാഹത്തെക്കുറിച്ച് നിങ്ങള്‍ക്ക് സംശയങ്ങളുണ്ടോ? വിവാഹത്തിനോട് താത്പര്യ കുറവുണ്ടോ ? എങ്ങനെ വിവാഹം മുടക്കുമെന്ന് അറിയാതെ വിഷമിക്കുകയാണോ ? എങ്കില്‍ നിങ്ങളുടെ വിവാഹം മുടക്കാന്‍ ഞാനുണ്ട് എന്നാണ് ആദ്യം വേരിയ സമൂഹമാധ്യമങ്ങളില്‍ കുറിച്ചത്.
സമൂഹമാധ്യമങ്ങളിലൂടെ ഇക്കാര്യം പങ്കു വച്ചതിനു പുറമേ നിരവധി വധൂ വരന്മാരാണ് വിവാഹം മുടക്കാനായി തന്നെ സമീപിച്ചതെന്ന് വേരിയ പറയുന്നു. നിരവധി സ്ത്രീകളും പുരുഷന്മാരും വിവാഹം മുടക്കാനായി തന്നെ സമീപിച്ചുവെന്നും അതോടെ ഇതൊരു പ്രൊഫഷന്‍ ആയി തീരുമാനിക്കുകയായിരുന്നുവെന്ന് വേരിയ പറയുന്നു.
അപ്പോൾ ഈ വിവരം വായിക്കുന്ന മലയാളികൾക്ക് ഇതിൽ താല്പര്യം ഉണ്ടെങ്കിൽ നിങ്ങൾക്ക് ടിയാന്റെ സേവനം ആവശ്യമുണ്ടെന്ന് തോന്നുന്ന പക്ഷം വിമാന കൂലിയും കൊടുത്ത് ആശാനെ കൊണ്ടുവരാം... ഒന്നുമല്ലെങ്കിലും ഇവിടെയുള്ള കല്യാണം മുടക്കികൾ ഒളിഞ്ഞിരുന്ന് അതും ഇതും പറഞ്ഞു വിവാഹം മുടക്കുന്നതിലും നല്ലത് പബ്ലിക്കായി കാര്യം തീർത്തു കൊടുക്കും, ഒരു പ്രൊഫഷണൽ ടച്ചും വരും!.