ചെന്നൈ അണ്ണാ സർവകലാശാല കാമ്പസിൽ പെൺകുട്ടിയെ ബലാത്സംഗം ചെയ്ത് സംഭവത്തിൽ സ്വന്തം ശരീരത്തിൽ ചാട്ടവാർ കൊണ്ടടിച്ച് പ്രതിഷേധിച്ച് തമിഴ്നാട്ടിലെ ബിജെപി അധ്യക്ഷൻ കെ.അണ്ണാമലൈ. പ്രതിഷേധത്തിന്റെ ഭാഗമായുള്ള 48 ദിവസത്തെ വ്രതം ആരംഭിക്കുന്നതിന് മുന്നോടിയായാണ് അണ്ണാമലൈ സ്വയം 'ശിക്ഷിച്ചത്'. പച്ച നിറത്തിലുള്ള മുണ്ടുടുത്ത് സ്വന്തം വീടിന് മുന്നിലായിരുന്നു അണ്ണാമലൈയുടെ പ്രതിഷേധം. വ്രതത്തിനുശേഷം തമിഴ്നാട്ടിലെ പ്രധാന മുരുക ക്ഷേത്രങ്ങളിൽ ദർശനം നടത്തും.
ഡിഎംകെ സർക്കാർ ഭരണത്തിൽനിന്ന് വീഴുംവരെ ചെരുപ്പ് ഉപയോഗിക്കില്ലെന്ന് കഴിഞ്ഞ ദിവസം അണ്ണാമലൈ പ്രഖ്യാപിച്ചിരുന്നു. ഇതിന് പിന്നാലെയാണ് ചാട്ടവാർ കൊണ്ട് ആറു തവണ ശരീരത്തിലടിച്ചത്. അണ്ണാമലൈ ആദ്യം പ്രാർഥിക്കുന്നതും പിന്നീട് അടിക്കുന്നതും വീഡിയോയിൽ കാണാം. ചുറ്റും പ്ലക്കാർഡ് പിടിച്ച് ബിജെപി പ്രവർത്തകർ നിൽക്കുന്നുണ്ടായിരുന്നു. ചാട്ടവാർ അടി പുരോഗമിക്കുന്നതിനിടയിൽ ഇതിൽ ഒരു പ്രവർത്തകൻ ഓടിയെത്തി അണ്ണാമലൈ തടയുന്നതും പിന്നീട് കെട്ടിപ്പിടിക്കുന്നതും വീഡിയോയിൽ കാണാം.