സൂപ്പര്മാര്ക്കറ്റില് വെച്ച് വിചിത്രമായ ആകൃതിയിലുള്ള ഈ മുട്ട കാണുന്നത്. കൗതുകം തോന്നിയ യുവതി മുട്ടയും വാങ്ങി വീട്ടിലെത്തി
മുട്ടയുടെ ആകൃതി എന്താണ് എന്ന് എല്ലാവർക്കും അറിയാം. എന്നാൽ ഗോളാകൃതിയുള്ള മുട്ടയേപ്പറ്റി അറിയാമോ. അങ്ങനെയും മുട്ടകളുണ്ട്. വളരെ അപൂർവമായി മാത്രമേ പൂർണമായും ഗോളാകൃതിയിലുള്ള മുട്ടകളുണ്ടാകു. അത്തരത്തിലൊരു മുട്ടയ്ക്ക് യു.കെയിൽ നടന്ന ലേലത്തിൽ ഇതുവരെ ക്വാട്ട് ചെയ്ത ഉയർന്ന വില 200 പൗണ്ട് ( ഏകദേശം 21,000 രൂപ) ആണ്. സാധാരണ കാണപ്പെടുന്നതിൽ നിന്ന് വ്യത്യസ്തമായി പൂർണമായും ഗോളാകൃതിയിലുള്ളതാണ് ഈ മുട്ട. യുകെയിലെ ബാക്ക്ഷ ( Berkshire ) കൗണ്ടിയിലെ ലാംബോണിലാണ് അപൂർവമായ മുട്ട ഇത്രയും വലിയ തുകയ്ക്ക് ലേലത്തിൽ പോയത്.
സാധാരണ മുട്ടയുടെ ഷെയ്പ്പില് നിന്ന് വ്യത്യസ്തമായി ഉരുണ്ട് വട്ടത്തിലായിരുന്നു ഈ മുട്ടയുടെ ആകൃതി എന്നത് തന്നെയാണ് ഇതിന്റെ പ്രത്യേകത. ലോകത്താകെയുണ്ടാകുന്ന 100 കോടി മുട്ടകളില് ഒന്ന് മാത്രമായിരിക്കും ഇത്തരത്തില് പൂര്ണമായും ഉരുണ്ട് വട്ടത്തില് ഉണ്ടാവുക.
സ്കോട്ട്ലന്ഡിലെ യുവതിയാണ് സൂപ്പര്മാര്ക്കറ്റില് വെച്ച് വിചിത്രമായ ആകൃതിയിലുള്ള ഈ മുട്ട കാണുന്നത്. കൗതുകം തോന്നിയ യുവതി മുട്ടയും വാങ്ങി വീട്ടിലെത്തി. തുടര്ന്ന് നടത്തിയ അന്വേഷണത്തിലാണ് ഈ മുട്ടയ്ക്ക് ആവശ്യക്കാര് ഏറെയാണെന്ന് കണ്ടെത്തിയത്. ഒരു കൈ പരീക്ഷിച്ച് നോക്കാമെന്ന് കരുതി യുവതി ലേലങ്ങള് നടത്തുന്ന സ്ഥാപനത്തെ ബന്ധപ്പെടുകയും വിവരമറിയിക്കുകയും ചെയ്തു. ഇതോടെയാണ് ലാംബോണ് സ്വദേശിയായ എഡ് പൗനല് മുട്ട വാങ്ങാനെത്തുന്നത്. കുടിച്ച ബിയറിന്റെ ആവേശത്തില് ലേലം നടക്കുന്ന വേദിയിലെത്തിയ പൗനല് 1.99 പൗണ്ട് (214രൂപ)യ്ക്ക് വാങ്ങിയ മുട്ട 16000 രൂപയ്ക്കാണ് വാങ്ങിയത്.
മദ്യത്തിന്റെ കെട്ടിറങ്ങി കഴിഞ്ഞതോടെ മുട്ട പ്രത്യേകതകൾ കണ്ടതോടെ മറിച്ചുവില്ക്കുകയായി പൗനലിന്റെ ലക്ഷ്യം.ഡിസംബറില് പൗനല് മുട്ട ഓക്സ്ഫോര്ഡ് കേന്ദ്രീകൃതമായി പ്രവര്ത്തിക്കുന്ന ചാരിറ്റി ലുവെന്റസ് ഫൗണ്ടേഷന് കൈമാറാന് തീരുമാനിച്ചു. മുട്ട കൈമാറാനുണ്ടെന്ന് പറഞ്ഞ് എത്തിയ പൗനലിനെ കണ്ട് അധികൃതര് ആദ്യം ഒന്ന് അമ്പരന്നു, പിന്ന പൊട്ടിച്ചിരിച്ചു. അല്പം സമയമെടുത്താണേലും മുട്ടയുടെ ഗുണങ്ങള് പൗനല് അധികൃതരെ പറഞ്ഞ് ബോധ്യപ്പെടുത്തി.
അപൂർവ മുട്ട ലേലത്തിന് വന്നുവെന്ന വാർത്തകൾ മാധ്യമങ്ങളിൽ വന്നതോടെ അത് വാങ്ങാൻ ആളുകളുമെത്തി. ലുവെന്റാസ് ഫൗണ്ടേഷൻ തങ്ങളുടെ സന്നദ്ധ പ്രവർത്തനങ്ങൾക്ക് പണം കണ്ടെത്താനായി നിരവധി സാധനങ്ങൾ ലേലത്തിൽ വെച്ചിരുന്നു. പലതും ആളുകൾ സംഭാവന ചെയ്തതാണ്. മുട്ടയുടെ വാർത്ത വന്നതോടെ മറ്റ് വസ്തുക്കൾക്കും ലേലത്തിൽ ഉയർന്ന തുക കിട്ടി.
ചാരിറ്റി ലുവെന്റസ് ഫൗണ്ടേഷന് ഡിസംബര് 11ന് ഈ മുട്ട 21, 000 രൂപയ്ക്ക് ലേലത്തില് വിറ്റഴിക്കപ്പെടുകയായിരുന്നു. 13നും 25നും ഇടയില് പ്രായമുള്ള യുവാക്കള് അനുഭവിക്കുന്ന മാനസിക പ്രയാസങ്ങളില് അവരെ സഹായിക്കാന് ലേലത്തില് ലഭിച്ച പണം ഉപയോഗിക്കുമെന്നാണ് ചാരിറ്റി കേന്ദ്രത്തിലെ അധികൃതര് പറയുന്നത്.
അതേസമയം മുട്ടയുടെ ഉള്ളിലെ മഞ്ഞക്കരുവും മുട്ടയുടെ വെള്ളയും നീക്കം ചെയ്തെന്നും ഗോളാകൃതിയുള്ള തോട് അതുപോലെ തന്നെ നിലനിര്ത്തിയാണ് മുട്ട ലേലത്തിനായി എത്തിച്ചത്.