കാര്‍ഷിക യന്ത്രോപകരണങ്ങള്‍ 80 ശതമാനം വരെ സര്‍ക്കാര്‍ സബ്‌സിഡിയോടെ വാങ്ങാന്‍ സാധിക്കുന്ന കാര്‍ഷിക യന്ത്രവത്കരണ ഉപ പദ്ധതിയിലേക്ക് (SMAM) ഇപ്പോള്‍ അപേക്ഷിക്കാം. അപേക്ഷകള്‍ ജനുവരി 15 മുതല്‍ ഓണ്‍ലൈനായാണ് നല്‍കേണ്ടത്.
എന്താണീ SMAM?
കാര്‍ഷിക യന്ത്രവത്കരണം ചെലവ് കുറഞ്ഞ രീതിയില്‍ പ്രോത്‌സാഹിപ്പിക്കുന്ന പദ്ധതിയാണിത്. കേന്ദ്ര സഹായത്തോടെ സംസ്ഥാന സര്‍ക്കാരാണ് സബ് മിഷന്‍ ഓണ്‍ അഗ്രികള്‍ച്ചറല്‍ മെക്കനൈസേഷന്‍ (കാര്‍ഷിക യന്ത്രവത്കരണ ഉപ പദ്ധതി - SMAM) നടപ്പിലാക്കുന്നത്. പദ്ധതിയില്‍പ്പെടുത്തി കാര്‍ഷിക യന്ത്രങ്ങള്‍ സര്‍ക്കാര്‍ സബ്‌സിഡിയോടെ വാങ്ങാം. കൃഷി, വിളവെടുപ്പാനന്തര, സംസ്‌കരണ, മൂല്യ വര്‍ധിത പ്രവര്‍ത്തനങ്ങള്‍ക്കാവശ്യമായ ഉപകരണങ്ങള്‍ക്കും യന്ത്രങ്ങള്‍ക്കുമാണ് സബ്സിഡി നല്‍കുന്നത്.
ആര്‍ക്കൊക്കെ വാങ്ങാം?
പദ്ധതിക്കു കീഴില്‍ വ്യക്തിഗത ഗുണഭോക്താക്കള്‍ക്ക് 40 മുതല്‍ 60 വരെ ശതമാനം സബ്‌സിഡിയില്‍ യന്ത്രങ്ങള്‍ വാങ്ങാം. കര്‍ഷകരുടെ കൂട്ടായ്മകള്‍, SHGകള്‍, FPO കള്‍, വ്യക്തികള്‍, പഞ്ചായത്തുകള്‍ തുടങ്ങിയവയ്ക്ക് കാര്‍ഷിക യന്ത്രങ്ങളുടെ വാടക കേന്ദ്രങ്ങള്‍ (കസ്റ്റം ഹയറിംഗ് സെന്ററുകള്‍) സ്ഥാപിക്കുന്നതിന് പദ്ധതി തുകയുടെ 40 ശതമാനം സാമ്പത്തിക സഹായം ലഭിക്കും. യന്ത്രവത്കരണ തോത് കുറവായ പ്രദേശങ്ങളില്‍ യന്ത്രവത്കരണം പ്രോത്‌സാഹിപ്പിക്കുന്നതിന് ഫാം മെഷിനറി ബാങ്കുകള്‍ സ്ഥാപിക്കുന്നതിനും സഹായം ലഭിക്കും. ഇങ്ങനെ ചെയ്യുന്നതിന് കര്‍ഷക ഗ്രൂപ്പുകള്‍ക്ക് 10 ലക്ഷം രൂപയുടെ പദ്ധതിക്ക് പരമാവധി 80 ശതമാനം എന്ന നിരക്കില്‍ എട്ടു ലക്ഷം രൂപ സാമ്പത്തിക സഹായം അനുവദിക്കും.
അപേക്ഷ എങ്ങനെ?
ജനുവരി 15 മുതല്‍ http://agrimachinery.nic.in/index എന്ന വെബ് സൈറ്റ് മുഖേനയാണ് അപേക്ഷ നല്‍കേണ്ടത്. പദ്ധതിയെക്കുറിച്ചുള്ള കൂടുതല്‍ വിവരങ്ങള്‍ക്കും അപേക്ഷിക്കുന്നതിനുള്ള സഹായങ്ങള്‍ക്കും ജില്ലകളിലെ കൃഷി അസിസ്റ്റന്റ് എക്‌സിക്യൂട്ടീവ് എന്‍ജിനീയറുടെ ഓഫീസിലോ, ആലപ്പുഴ, കോഴിക്കോട് എന്നിവിടങ്ങളിലെ കൃഷി എക്‌സിക്യൂട്ടീവ് എന്‍ജിനീയറുടെ ഓഫീസിലോ ബന്ധപ്പെടാം. സ്ഥലത്തെ കൃഷിഭവനന്‍ വഴിയും ഇതിനുള്ള നിര്‍ദേശങ്ങള്‍ ലഭിക്കും.
കൂടുതല്‍ വിവരങ്ങളറിയാന്‍ 0471-2306748, 0477-2266084, 0495-2725354 എന്നീ ഫോണ്‍ നമ്പറുകളിലോ, smamkerala@gmail.com എന്ന ഇ മെയിലിലോ ബന്ധപ്പെടാം.