വെള്ളത്തിനടിയിൽ ഏറ്റവും ആഴത്തിൽ ഫോട്ടോഷൂട്ട് നടത്തിയതിനുള്ള ഗിന്നസ് റെക്കോഡിന് അർഹനായി കനേഡിയൻ ഫോട്ടോഗ്രാഫർ സ്റ്റീവൻ ഹെയ്നിങ്. ഫ്ളോറിഡയിലെ ബാക റാറ്റണിലെ തകർന്ന ഹെഡ്രോ അറ്റ്ലാന്റിക് കപ്പലിൽനിന്ന് അമ്പത് മീറ്റർ താഴ്ചയിലാണ് ഫോട്ടോഷൂട്ട് നടത്തിയത്. ഡീകംപ്രഷൻ സോണിനപ്പുറമാണ് അറ്റ്ലാന്റിക് സൈറ്റ് സ്ഥിതിചെയ്യുന്നത്. ഇത് മൂന്നാമത്തെ തവണയാണ് സ്റ്റീവൻ റെക്കോഡ് നേടുന്നത്.
2021 ജൂണിലും 2023 സെപ്റ്റംബറിലും യഥാക്രമം 21, 30 മീറ്റർ താഴ്ചയിൽ ഫോട്ടോഷൂട്ട് നടത്തിയതിനായിരുന്നു സ്റ്റീവൻ റെക്കോഡ് നേടിയിരുന്നത്. 2023 ഡിസംബറിൽ കനേഡിയൻ ഫോട്ടോഗ്രാഫറായ കിം ബ്രൂണോ സ്റ്റീവന്റെ റെക്കോഡ് മറികടന്നിരുന്നു. ബഹാമാസിൽ 131 ഫീറ്റ് താഴ്ചയിൽ ഫോട്ടോഷൂട്ട് നടത്തിയായിരുന്നു കിം ബ്രൂണോ റെക്കോർഡ് നേടിയത്.
ഇത്തവണ സിയാര ആന്റോവ്സ്കി എന്ന മോഡലിനെയാണ് സ്റ്റീവൻ ഫോട്ടോഷൂട്ടിൽ പങ്കെടുപ്പിച്ചത്. കൂടുതൽ ആഴത്തിൽ ഫോട്ടോഷൂട്ട് നടത്താൻ തീരുമാനിച്ചതിനാൽ സ്റ്റീവനും സംഘവും തീവ്രപരിശീലനം നടത്തിയിരുന്നു. വെളുത്ത ഗൗണും കറുപ്പ് നിറത്തിലുള്ള ബൂട്ടുകളുമായിരുന്നു മോഡലിന്റെ വേഷം. ഓക്സിജൻ ടാങ്ക് ഇല്ലാതെയാണ് മോഡൽ സിയാര ആന്റോവ്സ്കി ഫോട്ടോഷൂട്ട് നടത്തിയത്.