സമൂഹ പങ്കാളിത്തത്തോടെയും പരസ്പരം സമ്മതത്തോടെയും ആണ് ബഹുഭർത്താക്കന്മാരെ സ്വീകരിക്കുന്ന ചടങ്ങുകൾ നടത്തുന്നത്
സമ്പന്നവും വൈവിധ്യപൂർണ്ണവുമായ വിവാഹ ചടങ്ങുകൾക്ക് പേരുകേട്ടതാണ് ഈ രാജ്യം. ഈ പാരമ്പര്യങ്ങൾ പ്രദേശം, മതം, സമൂഹം എന്നിവയെ ആശ്രയിച്ച് വ്യത്യാസപ്പെടുന്നു, പക്ഷേ പലപ്പോഴും വിപുലമായ ചടങ്ങുകൾ, ഊർജ്ജസ്വലമായ നിറങ്ങൾ, സംഗീതം, നൃത്തം, പ്രതീകാത്മക ആചാരങ്ങൾ എന്നിവ ഇതിൽ ഉൾപ്പെടുന്നു.
ഹിമാചൽ പ്രദേശിലെ (Himachal Pradesh) ഒരു പഴക്കമുള്ള ഹട്ടി സമൂഹം പോളിയാൻഡ്രി (ബഹുഭർതൃത്വം) പാരമ്പര്യം കാഴ്ചക്കാരുടെ ശ്രദ്ധ പിടിച്ചുപറ്റി.ഹിമാചൽ പ്രദേശിലെ ഷില്ലായ് ഗ്രാമത്തിൽ ഹട്ടി ഗോത്രത്തിലെ രണ്ട് സഹോദരന്മാർ ഒരു സ്ത്രീയെ വിവാഹം കഴിച്ചു. ബഹുഭർതൃത്വത്തിന്റെ കാലഹരണപ്പെട്ട പാരമ്പര്യത്തിന് കീഴിൽ നടന്ന വിവാഹത്തിന് നൂറുകണക്കിന് ആളുകൾ സാക്ഷ്യം വഹിച്ചു.
യാതൊരു സമ്മർദ്ദവുമില്ലാതെയാണ് തങ്ങൾ തീരുമാനമെടുത്തതെന്ന് വധു സുനിത ചൗഹാനും വരന്മാരായ പ്രദീപും കപിൽ നേഗിയും പറഞ്ഞു.
ജൂലൈ 12 ന് സിർമൗർ ജില്ലയിലെ ട്രാൻസ്-ഗിരി പ്രദേശത്ത് ആരംഭിച്ച് മൂന്ന് ദിവസം നീണ്ടുനിന്ന ചടങ്ങിന് പ്രാദേശിക നാടോടി ഗാനങ്ങളും നൃത്തങ്ങളും നിറം പകർന്നു. വിവാഹ ചടങ്ങിന്റെ വീഡിയോകൾ ഇന്റർനെറ്റിൽ വൈറലായിട്ടുണ്ട്.ഹട്ടി ഗോത്ര സമൂഹത്തിൻറെ കാലങ്ങളായുള്ള സാംസ്കാരികപരമായ ഒരു ആചാരമാണ് ഈ ബഹുഭർതൃത്വം (Polyandry). ഹിമാചൽ പ്രദേശിന് പുറത്ത് അധികം അറിയാതിരുന്ന ഈ ആചാരത്തെ പറ്റിയുള്ള നിശബ്ദത മറികടന്നാണ് സഹോദരന്മാർ വിവാഹിതരായത്.
കുൻഹട്ട് ഗ്രാമത്തിൽ നിന്നുള്ള സുനിത, പാരമ്പര്യത്തെക്കുറിച്ച് തനിക്ക് അറിയാമെന്നും യാതൊരു സമ്മർദ്ദവുമില്ലാതെയാണ് തീരുമാനമെടുത്തതെന്നും അവർ രൂപപ്പെടുത്തിയ ബന്ധത്തെ ബഹുമാനിക്കുന്നുവെന്നും പറഞ്ഞു.
ഷില്ലായ് ഗ്രാമത്തിൽ നിന്നുള്ള പ്രദീപ് ഒരു സർക്കാർ വകുപ്പിൽ ജോലി ചെയ്യുന്നു, ഇളയ സഹോദരൻ കപിലിന് വിദേശത്ത് ജോലിയുണ്ട്.
"ഞങ്ങൾ ആ പാരമ്പര്യം അഭിമാനിക്കുന്നതിനാൽ അതിനെ പരസ്യമായി പിന്തുടർന്നു, അത് ഒരു സംയുക്ത തീരുമാനമായിരുന്നു," പ്രദീപ് പറഞ്ഞു.
വിദേശത്ത് താമസിക്കാമെന്ന് കപിൽ പറഞ്ഞു, എന്നാൽ ഈ വിവാഹത്തിലൂടെ, "ഒരു ഏകീകൃത കുടുംബമെന്ന നിലയിൽ ഞങ്ങളുടെ ഭാര്യയ്ക്ക് പിന്തുണയും സ്ഥിരതയും സ്നേഹവും ഞങ്ങൾ ഉറപ്പാക്കുന്നു".
"ഞങ്ങൾ എല്ലായ്പ്പോഴും സുതാര്യതയിൽ വിശ്വസിക്കുന്നു," അദ്ദേഹം കൂട്ടിച്ചേർത്തു.
ഹിമാചൽ പ്രദേശ്-ഉത്തരാഖണ്ഡ് അതിർത്തിയിലെ പുറംലോകത്ത് നിന്ന് അകന്ന് കഴിയുന്ന സമൂഹമാണ് ഹട്ടി, മൂന്ന് വർഷം മുമ്പ് പട്ടികവർഗമായി (Tribal community) പ്രഖ്യാപിക്കപ്പെട്ടു. ഈ ഗോത്രത്തിൽ, നൂറ്റാണ്ടുകളായി ബഹുഭർതൃത്വം (Polyandry) പ്രചാരത്തിലുണ്ടായിരുന്നു, എന്നാൽ സ്ത്രീകൾക്കിടയിൽ വർദ്ധിച്ചുവരുന്ന സാക്ഷരതയും മേഖലയിലെ സമൂഹങ്ങളുടെ സാമ്പത്തിക ഉന്നമനവും കാരണം, ഒന്നിലധികം പുരുഷന്മാരെ കല്യാണം കഴിക്കുന്ന കേസുകൾ റിപ്പോർട്ട് ചെയ്യപ്പെട്ടില്ല.
ജോഡിദാരൻ, ദ്രൗപദി പ്രത എന്നറിയപ്പെടുന്ന ചടങ്ങ് ഹട്ടി സമൂഹത്തിൽ ഒരു പരമ്പരാഗത ആചാരമാണ് (Hatti Polyandry tradition). സമൂഹ പങ്കാളിത്തത്തോടെയും പരസ്പരം സമ്മതത്തോടെയും ആണ് ബഹുഭർത്താക്കന്മാരെ സ്വീകരിക്കുന്ന ചടങ്ങുകൾ നടത്തുന്നത്. പണ്ടുകാലം മുതലേ പല നാടുകളിലും പല പ്രമുഖ സമൂഹങ്ങളിലും ജാതികളിലും പറഞ്ഞുപോരുന്ന ന്യായീകരണം തന്നെയാണ് ഇവിടെയും ഈ വിഷയത്തിൽ ഹട്ടി സമൂഹത്തെയും പറയാനുള്ളത്. കുടുംബത്തിൻറെ ഐക്യം സംരക്ഷിക്കാൻ, പൂർവികരുടെ സ്വത്ത് അന്യാധീനപ്പെട്ടു പോകാതിരിക്കാൻ, സ്ത്രീ വിധവയായി പോകാതെ ഇരിക്കാൻ.
ഉത്തരാഖണ്ഡിന്റെ മറ്റ് ഭാഗങ്ങളിലും,സിർമൗർ ജില്ലയിലെ ട്രാൻസ്-ഗിരി പ്രദേശത്തും സാധാരണയായി നടക്കുന്ന ആചാരം തന്നെയാണ് ഇത്.ഇത്തരം വിവാഹങ്ങൾ രഹസ്യമായി നടത്തപ്പെടുകയും സമൂഹം അംഗീകരിക്കുകയും ചെയ്യുന്നുണ്ടെങ്കിലും സംഭവങ്ങൾ കുറവാണെന്ന് ഗ്രാമത്തിലെ മുതിർന്നവർ പറഞ്ഞു.
ഹിമാചൽ പ്രദേശിന്റെ ആദ്യ മുഖ്യമന്ത്രി വൈ.എസ്. പർമർ ഈ പാരമ്പര്യത്തെക്കുറിച്ച് ഗവേഷണം നടത്തുകയും ലഖ്‌നൗ സർവകലാശാലയിൽ നിന്ന് "ഹിമാലയൻ പോളിയാൻഡ്രിയുടെ സാമൂഹിക-സാമ്പത്തിക പശ്ചാത്തലം" എന്ന വിഷയത്തിൽ പിഎച്ച്.ഡി പൂർത്തിയാക്കുകയും ചെയ്തു.
വിദഗ്ധരുടെ അഭിപ്രായത്തിൽ, പാരമ്പര്യത്തിന് പിന്നിലെ പ്രധാന പരിഗണനകളിലൊന്ന് പൂർവ്വിക ഭൂമി വിഭജിക്കപ്പെടുന്നില്ലെന്ന് ഉറപ്പാക്കുക എന്നതായിരുന്നു, അതേസമയം പൂർവ്വിക സ്വത്തിൽ ആദിവാസി സ്ത്രീകളുടെ വിഹിതം ഇപ്പോഴും ഒരു പ്രധാന പ്രശ്നമാണ്.
Polyandry (ബഹുഭർതൃത്വം) എന്നത് പുരാതന കാലം മുതലേ പല സമൂഹങ്ങളിലും നിലനിന്നു പോകുന്ന ഒരു സമ്പ്രദായമാണ്. പ്രാകൃത ഗോത്രവർഗങ്ങളിലും, അതിൽ നിന്ന് പുരോഗമിച്ച ജനവിഭാഗങ്ങൾക്കിടയിലും ഈ സമ്പ്രദായം നിലനിന്നിരുന്നു. ഇപ്പോഴും പരിഷ്കൃത സമൂഹത്തിനിടയിൽ ചിലയിടങ്ങളിലും ഇത് നിലനിന്നു പോകുന്നുണ്ട്. അതിന് ആ സമൂഹത്തിന് കാരണങ്ങൾ ഉണ്ടാവാം അതിനെ ന്യായീകരിക്കാൻ, അത് ചിലതൊക്കെ ശരിയുമാകാം. ചില സമൂഹങ്ങൾ അത് പരമ്പരാഗതമായും, ആചാരപരമായും തുടർന്നുപോകുന്നു.
"ബഹുഭർതൃത്വം" എന്നതുകൊണ്ട് ഉദ്ദേശിക്കുന്നത് ഒരു സ്ത്രീ ഒരേസമയം ഒന്നിലധികം പുരുഷന്മാരെ വിവാഹം കഴിച്ച് അവർക്കൊപ്പം താമസിക്കുന്ന സമ്പ്രദായമാണ്. വളരെ വിരളമായ സാമൂഹ്യ സമ്പ്രദായമായി ബഹുഭർതൃത്വം കണക്കാക്കാം. പ്രത്യേകിച്ച് പുരുഷ കേന്ദ്രീകൃതമായ സാമൂഹ്യവ്യവസ്ഥയിൽ.
ബഹുഭാര്യത്വത്തിന് വിപരീതമായതാണ് ബഹുഭർതൃത്വം. ഒരു സ്ത്രീ അവൾ പ്രായമുള്ളതാവാം യുവതിയാവാം ഒന്നിലധികം പുരുഷന്മാരെ വിവാഹം കഴിക്കുകയും, അവരെല്ലാരുമായി ലൈംഗിക വേഴ്ചയിൽ ഏർപ്പെടുന്ന സമ്പ്രദായം ബഹുഭർതൃത്വം.
ആദ്യ കാലം മുതലും ഇപ്പോഴും പലയിടത്തും രഹസ്യമായും പരസ്യമായും നടക്കുന്നതാണ് ബഹുഭാര്യത്വം. ഒരു പുരുഷനെ ഒന്നിലധികം സ്ത്രീകളുമായി ബന്ധമുണ്ടാകുന്നത്, അത് വിവാഹജീവിതം ആവാം, രഹസ്യമായി മറ്റു തരത്തിലുള്ള ബന്ധവും ആവാം അതാണ് ബഹുഭാര്യത്വം എന്ന് ഉദ്ദേശിക്കുന്നത്. ഇപ്പോഴും പല ജനവിഭാഗങ്ങൾക്കിടയിലും മതവിഭാഗങ്ങൾക്കിടയിലും ഇത് അംഗീകരിക്കപ്പെട്ടിട്ടുള്ളതാണ്. ബഹുഭാര്യത്വത്തെ അപേക്ഷിച്ച് ബഹുഭർതൃത്വം അപൂർവ്വമായാണ് കാണപ്പെടുന്നത്.
ലോകത്തിൽ ബഹുഭർതൃത്വം നിലനിൽക്കുന്നത് വളരെ കുറഞ്ഞ ചില സമൂഹങ്ങളിൽ മാത്രമാണ്. ഇന്ത്യയിലെ ചില പ്രദേശങ്ങളിലും തിബറ്റിലും, കേരളത്തിലും ഈ സമ്പ്രദായം നിലനിന്നു പോന്നിരുന്നു. കേരളത്തിൽ നായർ, തെക്കേ മലബാറിലെ തിയര്‍ സമുദായങ്ങളിലാണ് ബഹുഭർതൃത്വം നിലനിന്നിരുന്നത്.ബഹുഭർതൃത്വം നിലനിർത്തുന്നതിന് കാരണം ഭൂമിയുടെ പ്രശ്നം തന്നെയാണ്.ഭൂമി പങ്കിട്ടെടുക്കുന്നത് ഒഴിവാക്കാനും, സാമ്പത്തിക ബാധ്യതകൾ കുറയ്ക്കാനും, സാമൂഹ്യവുമായും, മറ്റ് സാമ്പത്തികപരമായ പ്രശ്നങ്ങളും ഒഴിവാക്കുന്നതിന് വേണ്ടിയാണ്.
#traditional #marriage #magazine