വായ്പ കുടിശ്ശിക ഉള്ളവർക്ക് സംഘടനാ സംവിധാനത്തിലേക്ക് മത്സരിക്കാൻ ആവില്ല.
സമൂഹ പങ്കാളിത്തത്തോടെ ദാരിദ്ര്യം നിര്‍മാര്‍ജനം ചെയ്യുന്നതിനും സ്ത്രീശാക്തീകരണത്തിനുമുള്ള കേരള സര്‍ക്കാരിന്റെ പദ്ധതിയായ കുടുംബശ്രീ (Kudumbashree) ഇതാ അടുത്ത ഘട്ടത്തിലേക്ക് നീങ്ങുകാണ്. ഇപ്പോഴിതാ കുടുംബശ്രീ കമ്യൂണിറ്റി ഡെവലപ്മെന്റ് സൊസൈറ്റി(സിഡിഎസ്)യുടെ ബൈലോ ഭേദഗതി ചെയ്ത് തദ്ദേശവകുപ്പ് അംഗീകരിച്ച് ഉത്തരവ് ഇറക്കിയിരിക്കുകയാണ്.
പുതിയ ഉത്തരവ് പ്രകാരം എല്ലാ കുടുംബങ്ങള്‍ക്കും അയല്‍ക്കൂട്ടം അംഗങ്ങളാകാം എന്നതാണ് ശ്രദ്ധേയം. ഇതില്‍ 40 ശതമാനംവരെ പുരുഷന്മാരെ ഉള്‍പ്പെടുത്താം എന്നത്പുതിയ തുടക്കം തന്നെയാണ്. സിഡിഎസ് ചെയര്‍പേഴ്സണ്‍മാര്‍ക്ക് ഓണറേറിയത്തോടെ ആറുമാസം പ്രസവാവധി അനുവദിക്കാമെന്നും ബൈലോയില്‍ വ്യക്തമാക്കുന്നുണ്ട്.
അംഗങ്ങളില്‍ മാനസികോല്ലാസം ഉറപ്പുവരുത്തുന്നതിനൊപ്പം സര്‍ഗാത്മക കഴിവുകള്‍ പരിപോഷിപ്പിക്കാനുള്ള ഇടമാക്കി കുടുംബശ്രീയെ മാറ്റണമെന്നും വൈജ്ഞാനിക സമ്പദ്ഘടന പ്രോത്സാഹിപ്പിക്കണെന്നും ഇതിലൂടെ ലക്ഷ്യമിടുന്നുണ്ട്.
അവശത അനുഭവിക്കുന്ന ബധിര-മൂകര്‍, അന്ധര്‍, മാനസിക-ശാരീരിക വെല്ലുവിളി നേരിടുന്നവര്‍, എയ്ഡ്സ് ബാധിതര്‍, ട്രാന്‍സ്ജെന്‍ഡേഴ്‌സ്, വയോജനങ്ങള്‍ തുടങ്ങിയവര്‍ക്കായി പ്രത്യേക അയല്‍ക്കൂട്ടം രൂപീകരിക്കാം. തുടര്‍ന്ന് സിഡിഎസ് നേതൃത്വത്തില്‍ പ്രവര്‍ത്തിക്കുകയോ ഒന്നില്‍കൂടുതല്‍ സംഘങ്ങളുണ്ടെങ്കില്‍ പ്രത്യേക എഡിഎസും രൂപീകരിക്കുകയും ചെയ്യാം.
ഇനി കുടുംബശ്രീ സംഘടനാ സംവിധാനത്തില്‍ വായ്പാ കുടിശ്ശികയുള്ളവര്‍ക്കും പ്രതിമാസ ഓണറേറിയമോ ശമ്പളമോ കൈപ്പറ്റുന്നവര്‍ക്കും കുടുംബശ്രീ സംഘടനാ സംവിധാനത്തിലേക്ക് മത്സരിക്കാന്‍ കഴിയില്ല.
കുടുംബശ്രീ വിലയിരുത്തല്‍ സമിതിയെ സിഡിഎസ് സംയോജന വികസന സമിതി എന്നു പുനര്‍നാമകരണംചെയ്തു. അതോടൊപ്പം അയല്‍ക്കൂട്ടം അംഗമല്ലാത്ത 10 മുതല്‍ 20 പേരടങ്ങുന്ന യുവതികൂട്ടായ്മയായ ഓക്സിലറി ഗ്രൂപ്പിന്റെ പ്രവര്‍ത്തനങ്ങളും ബൈലോയില്‍ ഉള്‍പ്പെടുത്തി.
അയല്‍കൂട്ടങ്ങളില്‍ എസ്സി/എസ്ടി, തീരദേശ മേഖലയിലെ കുടുംബങ്ങള്‍ എന്നിവരെ കുടിംബശ്രീയില്‍ ചേര്‍ക്കണം. ഏതെങ്കിലും കാരണവശാല്‍ ഒരു അയല്‍കൂട്ടത്തിന് എഡിഎ-സ് അഫിലിയേഷന്‍ ശുപാര്‍ശയ്ക്ക് വിസമ്മതിച്ചാല്‍ സിഡിഎസ് ഉചിതമായ തീരുമാനം എടുക്കണം.
സിഡിഎസ് വിസമ്മതിച്ചാല്‍ ജില്ലാ മിഷന്‍ കോര്‍ഡിനേറ്റര്‍ ഒരു മാസത്തിനുള്ളില്‍ തീരുമാനമെടുക്കണം. വാര്‍ഡ് അടിസ്ഥാനത്തില്‍ പ്രവര്‍ത്തനം കാര്യക്ഷമമാക്കാന്‍ എഡിഎസ് സംയോജന വികസന സമിതിയും സാമ്പത്തിക കാര്യങ്ങള്‍ കൂടുതല്‍ സുതാര്യവും കാര്യക്ഷമവുമാക്കാന്‍ ഓഡിറ്റ് സമിതിയും രൂപീകരിക്കണം എന്നും ബൈലോയില്‍ പറയുന്നു.
അതേസമയം യുവതി കൂട്ടായ്‌മയായ ഓക്സിലറി ഗ്രൂപ്പുകളാണ്‌ കോളേജുകളിൽ ആരംഭിക്കുന്നത്‌. 18നും 40നും ഇടയിൽ പ്രായമുള്ളവർക്കായാണ്‌ ഓക്സിലറി ഗ്രൂപ്പുകൾ ആരംഭിച്ചത്‌. ആദ്യഘട്ടമായി ഒരു ജില്ലയിൽ ഒരു കോളേജിലാണ്‌ ഇ‍ൗ ഗ്രൂപ്പ് ആരംഭിക്കുന്നത്‌. ഇതിനായി 14 കോളേജുകളുടെ പട്ടിക ഉന്നത വിദ്യാഭ്യാസ ഡയറക്ടർ കുടുംബശ്രീ എക്‌സിക്യൂട്ടീവ്‌ ഡയറക്ടർക്ക്‌ കൈമാറി. കാൽനൂറ്റാണ്ട്‌ പിന്നിട്ട കുടുംബശ്രീയുടെ ചരിത്രത്തിൽ നിർണായക കാൽവെയ്‌പാണ്‌ കോളേജുകളിൽ ആരംഭിക്കുന്ന ഓക്സിലറി ഗ്രൂപ്പുകൾ. ആദ്യഘട്ടം വിജയമായാൽ എല്ലാ കോളേജുകളിലേക്കും പദ്ധതി വ്യാപിപ്പിക്കും.
നിലവിൽ 40 വയസ്സാണ്‌ കുടുംബശ്രീ അയൽകൂട്ടം അംഗമാകാനുള്ള കുറഞ്ഞ പ്രായം. ഇതേ തുടർന്നാണ്‌ യുവതികളെ കുടുംബശ്രീയുടെ ഭാഗമാക്കാൻ രണ്ട്‌ വർഷം മുമ്പ് ഓക്സിലറി ഗ്രൂപ്പുകൾ ആരംഭിച്ചത്‌. 18 മുതൽ 40 വയസ്സുവരെയുള്ള പത്തു മുതൽ 20 വരെയുള്ള യുവതികൾ ഉൾപ്പെട്ടതാണ്‌ ഒരു ഗ്രൂപ്പ്. കരിയർ ഗൈഡൻസ്‌, ക‍ൗൺസിലിങ്‌, സർഗാത്മ പ്രവർത്തനം തുടങ്ങി വിപുലമായ പദ്ധതികളാണ്‌ ഓക്സിലറി ഗ്രൂപ്പ് ഏറ്റെടുക്കുന്നത്‌. നിലവിൽ സംസ്ഥാനത്ത്‌ 19472 ഓക്സിലറി ഗ്രൂപ്പുണ്ട്‌. കോളേജുകളിൽ ഇ‍ൗ ഗ്രൂപ്പുകൾക്ക്‌ വലിയ സാധ്യതയാണുള്ളത്‌.
കോളേജുകളിൽ വിദ്യാർഥിനികൾക്കിടയിൽ ഓക്സിലറി ഗ്രൂപ്പ് സംബന്ധിച്ച അവബോധം സൃഷ്‌ടിക്കലാണ്‌ ആദ്യ ഘട്ടം. തുടർന്നാകും ഗ്രൂപ്പുകൾ ആരംഭിക്കുക. 20 പേരടങ്ങിയ ഒന്നിലേറ ഗ്രൂപ്പുകൾ ഓരോ കോളേജിലുമുണ്ടാകും. കോളേജ്‌ ഗ്രൂപ്പ് അംഗത്വത്തിന്‌ പുറമെ നാട്ടിലെ ഓക്സിലറി ഗ്രൂപ്പിലും അംഗത്വം ലഭിക്കും. ഇരട്ട അംഗത്വമുള്ളതിനാൽ കോളേജ്‌ പഠനത്തിന്‌ ശേഷം നാട്ടിലെ ഓക്സിലറി ഗ്രൂപ്പിൽ തുടരാനുമാകും. ഇവരുടെ അറിവിനെ നാട്ടിലെ അയൽകൂട്ടങ്ങൾക്ക്‌ ഉപയോപ്പെടുത്താനുമാകും.
ആദ്യഘട്ടം ഓക്സിലറി ഗ്രൂപ്പ് രൂപീകരിക്കുന്ന കോളേജുകൾ :
1. ഗവ. വനിതാ കോളേജ്‌– തിരുവനന്തപുരം
2. എസ്‌ എൻ വനിതാ കോളേജ്‌– കൊല്ലം
3. കാതോലിക്കറ്റ്‌ കോളേജ്‌–പത്തനംതിട്ട
4. സനാതന ധർമ കോളേജ്‌–ആലപ്പുഴ
5.ഗവ. കോളേജ്‌ –കോട്ടയം
6. ഗവ. കോളേജ്‌ ,കട്ടപ്പന–ഇടുക്കി
7. മഹാരാജാസ്‌ കോളേജ്‌– എറണാകുളം
8. വിമല കോളേജ്‌–തൃശൂർ
9. മേഴ്‌സി കോളേജ്‌–പാലക്കാട്‌
10. പിഎസ്‌എംഒ കോളേജ്‌, തിരൂരങ്ങാടി–മലപ്പുറം
11. ഗവ. ആർട്‌സ്‌ ആന്‍ഡ് സയൻസ്‌ കോളേജ്‌– കോഴിക്കോട്‌
12. ഗവ. കോളേജ്‌, മാനന്തവാടി–വയനാട്‌
13. ഗവ.ബ്രണ്ണൻ കോളേജ്‌, ധർമടം– കണ്ണൂർ
14. സെന്റ്‌ പയസ്‌ ടെൻത്‌ കോളേജ്‌,രാജപുരം– കാസർകോട്‌