മെറ്റ അവരുടെ ജനപ്രിയ ആപ്പുകളിൽ ഒന്ന് ഉടൻ പിൻവലിക്കും. വിൻഡോസിനും മാകിനും ലഭ്യമായ മെസഞ്ചർ ഡെസ്ക്ടോപ്പ് ആപ്പ് 2025 ഡിസംബർ 15 മുതൽ പൂർണ്ണമായും നിർത്തലാക്കുമെന്നാണ് മെറ്റയുടെ പ്രഖ്യാപനം. ഈ തീയതിക്ക് ശേഷം, ആപ്പിലേക്ക് ലോഗിൻ ചെയ്യാൻ സാധിക്കില്ല. പകരം സന്ദേശങ്ങൾ അയയ്‌ക്കാനും സ്വീകരിക്കാനും ഫേസ്ബുക്കിന്‍റെ വെബ്‌സൈറ്റ് ഉപയോഗിക്കാൻ നിങ്ങളെ റീഡയറക്‌ട് ചെയ്യും.
മാകിനുള്ള മെസഞ്ചർ ആപ്പ് നിർത്തലാക്കുകയാണ് എന്നും നിർത്തലാക്കിയതിന് ശേഷം നിങ്ങൾക്ക് ഈ ആപ്പിലേക്ക് ലോഗിൻ ചെയ്യാൻ കഴിയില്ലെന്നും ഫേസ്ബുക്ക് വെബ്‌സൈറ്റ് സന്ദേശമയയ്‌ക്കുന്നതിനായി സ്വയമേവ റീഡയറക്‌ട് ചെയ്യപ്പെടും എന്നും മെറ്റ സപ്പോർട്ട് പേജിൽ പറയുന്നു. ഈ പേജിൽ മാകിനെക്കുറിച്ച് മാത്രമേ പരാമർശിക്കുന്നുള്ളൂവെങ്കിലും, വിൻഡോസിലും മാകിലുമുള്ള മെസഞ്ചറിന്‍റെ സ്റ്റാൻഡ്-എലോൺ ഡെസ്ക്ടോപ്പ് ആപ്പുകൾ ഡിസംബർ 15-ന് ഷട്ട് ഡൗൺ ചെയ്യുമെന്ന് കമ്പനി ടെക്‌ക്രഞ്ചിനോട് സ്ഥിരീകരിച്ചു.
നിങ്ങൾ നിലവിൽ messenger desktop app ഉപയോഗിക്കുന്നുണ്ടെങ്കിൽ ഷട്ട് ഡൗൺ പ്രക്രിയ ആരംഭിക്കുമ്പോൾ നിങ്ങൾക്ക് ഒരു ഇൻ-ആപ്പ് അറിയിപ്പ് ലഭിക്കും. അപ്പോൾ മുതൽ, ആപ്പ് പൂർണ്ണമായും പ്രവർത്തിക്കുന്നത് നിർത്തുന്നതിന് മുമ്പ് നിങ്ങൾക്ക് 60 ദിവസം ആപ്പ് ഉപയോഗിക്കുന്നത് തുടരാം. ഈ കാലയളവിനുശേഷം ആപ്പ് ബ്ലോക്ക് ചെയ്യപ്പെടും. കൂടാതെ ആപ്പ് അൺഇൻസ്റ്റാൾ ചെയ്യാൻ മെറ്റ ശുപാർശ ചെയ്യും.
ഉപയോക്താക്കളുടെ ഒരു പ്രധാന ആശങ്കയായ ചാറ്റ് ഹിസ്റ്ററി സംരക്ഷിക്കാൻ മെറ്റ നടപടി സ്വീകരിക്കുന്നുണ്ട്. നിങ്ങൾ ആവശ്യമായ നടപടികൾ സ്വീകരിക്കുന്നിടത്തോളം കാലം നിങ്ങളുടെ സന്ദേശങ്ങൾ അപ്രത്യക്ഷമാകില്ല. മെസഞ്ചറിൽ ഇതുവരെ സുരക്ഷിതമായ സ്റ്റോറേജ് ഓണാക്കിയിട്ടില്ലാത്ത ഉപയോക്താക്കൾ അത് ഓണാക്കി അവരുടെ ഡെസ്ക്ടോപ്പ് ആപ്പിൽ ഒരു പിൻ സജ്ജീകരിക്കണം. വെബ് (web) പതിപ്പിലേക്ക് മാറുന്നതിന് മുമ്പ് നിങ്ങളുടെ ചാറ്റ് ഹിസ്റ്ററി സംരക്ഷിക്കപ്പെട്ടിട്ടുണ്ടെന്ന് ഇത് ഉറപ്പാക്കുന്നു.
സുരക്ഷിത സ്റ്റോറേജ് ഇതിനകം ഓണാക്കിയിട്ടുണ്ടോ എന്ന് പരിശോധിക്കുന്നത് എങ്ങനെ?
മെസഞ്ചർ തുറന്ന് നിങ്ങളുടെ പ്രൊഫൈൽ ചിത്രത്തിന് മുകളിലുള്ള സെറ്റിംഗ്‍സിൽ ക്ലിക്കുചെയ്യുക.
പ്രൈവസി - സുരക്ഷ തിരഞ്ഞെടുക്കുക. തുടർന്ന് എൻഡ്-ടു-എൻഡ് എൻക്രിപ്റ്റ് ചെയ്‌ത ചാറ്റുകൾ തിരഞ്ഞെടുക്കുക.
മെസേജ് സ്റ്റോറേജിൽ ക്ലിക്ക് ചെയ്‌ത് 'ടേൺ ഓൺ സെക്വർ സ്റ്റോറേജ്' ഓണാക്കിയിട്ടുണ്ടോ എന്ന് പരിശോധിക്കുക.
ഫേസ്ബുക്ക് അക്കൗണ്ട് ഇല്ലാതെ മെസഞ്ചർ ഉപയോഗിക്കുന്നുണ്ടോ?
ഫേസ്ബുക്ക് അക്കൗണ്ട് ഇല്ലാതെ മെസഞ്ചർ മാത്രമായി ഉപയോഗിക്കുന്നവർ ഡെസ്ക്ടോപ്പ് ആപ്പ് ഷട്ട് ഡൗൺ ചെയ്‌തതിന് ശേഷവും മെസഞ്ചർ ഡോട്ട് കോമിൽ ലോഗിൻ ചെയ്‌‌തുകൊണ്ട് നിങ്ങൾക്ക് മെസഞ്ചർ അക്കൗണ്ട് ഉപയോഗിക്കുന്നത് തുടരാം. അതായത് നിങ്ങളുടെ സുഹൃത്തുക്കളുമായും കോൺടാക്റ്റുകളുമായും ചാറ്റ് ചെയ്യുന്നത് തുടരാൻ ഒരു ഫേസ്ബുക്ക് അക്കൗണ്ട് സൃഷ്‌ടിക്കേണ്ടതില്ല.