സത്യപ്രതിജ്ഞാ ചടങ്ങുകളിൽ വന്ദേമാതരം ആലപിച്ചതുമായി ബന്ധപ്പെട്ട് ദേശീയതലത്തിൽ ചില ചർച്ചകൾ ഉയരുന്നുണ്ട്.
പത്ത് വർഷത്തെ ഇടവേളയ്ക്ക് ശേഷം കേരളത്തിൽ യുണൈറ്റഡ് ഡെമോക്രാറ്റിക് ഫ്രണ്ട് (യുഡിഎഫ്) സർക്കാർ വീണ്ടും അധികാരത്തിലേറി. തിരുവനന്തപുരം സെൻട്രൽ സ്റ്റേഡിയത്തിൽ രാവിലെ 10.15ന് നടന്ന പ്രൗഢഗംഭീരമായ ചടങ്ങിൽ കേരളത്തിന്റെ പുതിയ മുഖ്യമന്ത്രിയായി വി.ഡി. സതീശൻ (VD Satheesan) സത്യപ്രതിജ്ഞ ചെയ്ത് അധികാരമേറ്റു. ഗവർണർ രാജേന്ദ്ര അർലേക്കർ മുഖ്യമന്ത്രിക്ക് സത്യവാചകം ചൊല്ലിക്കൊടുത്തു. മുഖ്യമന്ത്രിക്ക് പിന്നാലെ പുതിയ മന്ത്രിസഭാംഗങ്ങളും ഗവർണർ മുൻപാകെ സത്യപ്രതിജ്ഞ ചെയ്തു. ആറ് പതിറ്റാണ്ടിന് ശേഷം ആദ്യമായാണ് ഒരു യുഡിഎഫ് മന്ത്രിസഭ മുഖ്യമന്ത്രിയോടൊപ്പം ഒന്നിച്ച് സത്യപ്രതിജ്ഞ ചെയ്യുന്നത് എന്ന പ്രത്യേകതയും ഈ ചടങ്ങിനുണ്ടായിരുന്നു.
വന്ദേമാതരത്തോടെ തുടങ്ങി ജനഗണമനയോടെയാണ് സത്യപ്രതിജ്ഞാ ചടങ്ങുകൾക്ക് തുടക്കമായത്. മുഖ്യമന്ത്രി വി.ഡി. സതീശൻ ദൈവനാമത്തിലാണ് സത്യപ്രതിജ്ഞ ചെയ്തത്.
പുതിയ മന്ത്രിസഭാംഗങ്ങൾ
മുഖ്യമന്ത്രി വി.ഡി. സതീശന് പുറമെ 20 മന്ത്രിമാരാണ് പുതിയ മന്ത്രിസഭയിലുള്ളത്. സത്യപ്രതിജ്ഞ ചെയ്ത മറ്റ് മന്ത്രിമാർ താഴെ പറയുന്നവരാണ്:
* പി.കെ. കുഞ്ഞാലിക്കുട്ടി
* രമേശ് ചെന്നിത്തല
* സണ്ണി ജോസഫ്
* കെ. മുരളീധരൻ
* മോൻസ് ജോസഫ്
* ഷിബു ബേബി ജോൺ
* സി.പി. ജോൺ
* അനൂപ് ജേക്കബ്
* എ.പി. അനിൽകുമാർ
* ബിന്ദു കൃഷ്ണ
* പി.സി. വിഷ്ണുനാഥ്
* എം. ലിജു
* ടി. സിദ്ദിഖ്
* റോജി എം. ജോൺ
* ഒ.ജെ. ജനീഷ്
* കെ.എ. തുളസി
* പി.കെ. ബഷീർ
* എൻ. ഷംസുദ്ദീൻ
* കെ.എം. ഷാജി
* വി.ഇ. അബ്ദുൾ ഗഫൂർ
രാഷ്ട്രീയ സൗഹാർദ്ദത്തിന്റെ വേദി
ദേശീയ-സംസ്ഥാന രാഷ്ട്രീയത്തിലെ പ്രമുഖരുടെ സാന്നിധ്യം കൊണ്ട് ചടങ്ങ് ശ്രദ്ധേയമായി. കോൺഗ്രസ് അധ്യക്ഷൻ മല്ലികാർജുൻ ഖർഗെ, സംഘടന ചുമതലയുള്ള ജനറൽ സെക്രട്ടറി കെ.സി. വേണുഗോപാൽ, ലോക്സഭാ പ്രതിപക്ഷ നേതാവ് രാഹുൽ ഗാന്ധി, വയനാട് എംപി പ്രിയങ്കാ ഗാന്ധി എന്നിവരും കർണാടക മുഖ്യമന്ത്രി സിദ്ധരാമയ്യ, ഉപമുഖ്യമന്ത്രി ഡി.കെ. ശിവകുമാർ എന്നിവരും ചടങ്ങിൽ പങ്കെടുത്തു.
ജനാധിപത്യ മര്യാദകളും രാഷ്ട്രീയ സൗഹാർദ്ദവും ഉയർത്തിപ്പിടിച്ചുകൊണ്ട് പ്രതിപക്ഷ നേതാക്കളും ചടങ്ങിൽ സന്നിഹിതരായിരുന്നു. പുതിയ മുഖ്യമന്ത്രിയുടെ പ്രത്യേക ക്ഷണം സ്വീകരിച്ച് മുൻ മുഖ്യമന്ത്രി പിണറായി വിജയൻ, സിപിഐഎം സംസ്ഥാന സെക്രട്ടറി എം.വി. ഗോവിന്ദൻ, സിപിഐ സംസ്ഥാന സെക്രട്ടറി ബിനോയ് വിശ്വം എന്നിവരും സത്യപ്രതിജ്ഞാ ചടങ്ങിന് സാക്ഷ്യം വഹിക്കാനെത്തി.
സത്യപ്രതിജ്ഞയിലെ വ്യത്യസ്തതകൾ
ദൈവനാമത്തിലും സഗൗരവവും: യുഡിഎഫ് മന്ത്രിസഭയിലെ വി.ഡി. സതീശൻ അടക്കമുള്ള 19 പേരും ദൈവനാമത്തിൽ സത്യപ്രതിജ്ഞ ചെയ്തപ്പോൾ രണ്ടുപേർ വ്യത്യസ്തരായി. തിരുവനന്തപുരം സെൻട്രലിൽ നിന്ന് കന്നിവിജയം നേടിയ സി.പി. ജോണും ചവറയിൽ നിന്ന് മൂന്നാമതും വിജയിച്ച ഷിബു ബേബി ജോണും സഗൗരവമാണ് സത്യപ്രതിജ്ഞ ചെയ്തത്. (ഇതിനു മുൻപത്തെ പിണറായി വിജയൻ സർക്കാരിൽ 6 പേർ ദൈവനാമത്തിലും മറ്റുള്ളവർ സഗൗരവത്തിലുമായിരുന്നു സത്യപ്രതിജ്ഞ ചെയ്തിരുന്നത്).
ഇംഗ്ലീഷിൽ സത്യവാചകം: കെ. മുരളീധരൻ ഇംഗ്ലീഷിലാണ് സത്യവാചകം ചൊല്ലിയത്. നിറഞ്ഞ കയ്യടികളോടെയാണ് ജനക്കൂട്ടം മുരളീധരന്റെ സത്യപ്രതിജ്ഞയെ സ്വീകരിച്ചത്.
മുസ്ലിം ലീഗിന്റെ മന്ത്രിമാർ
മുസ്ലിം ലീഗിൽ നിന്ന് ഇത്തവണ 5 മന്ത്രിമാരാണ് സഭയിലുള്ളത്. പി.കെ. കുഞ്ഞാലിക്കുട്ടി ഒഴികെ ബാക്കി നാല് പേരും ആദ്യമായാണ് മന്ത്രി പദവിയിലെത്തുന്നത്. കെ.എം. ഷാജി, പി.കെ. ബഷീർ, എൻ. ഷംസുദ്ദീൻ, വി.ഇ. അബ്ദുൾ ഗഫൂർ എന്നിവരാണ് ലീഗിന്റെ മറ്റ് മന്ത്രിമാർ. ഇത്തവണ 27 പേരാണ് ലീഗിൽ നിന്ന് തിരഞ്ഞെടുപ്പ് കളത്തിലുണ്ടായിരുന്നത്, അതിൽ 22 എംഎൽഎമാർക്ക് ജനവിധി അനുകൂലമായി.
സത്യപ്രതിജ്ഞാ ചടങ്ങുകളിൽ വന്ദേമാതരം ആലപിച്ചതുമായി ബന്ധപ്പെട്ട് ദേശീയതലത്തിൽ ചില ചർച്ചകൾ ഉയരുന്നുണ്ട്. കേരളത്തിലും തമിഴ്നാട്ടിലും ചടങ്ങിന്റെ തുടക്കത്തിൽ വന്ദേമാതരം ചൊല്ലിയപ്പോൾ ബിജെപി ഭരിക്കുന്ന പശ്ചിമ ബംഗാളിൽ പക്ഷേ ഇത് നടപ്പിലായില്ല.
കേന്ദ്ര നിർദേശത്തെ തുടർന്ന് നേരത്തെ തമിഴ്നാട് മുഖ്യമന്ത്രി വിജയ് സത്യപ്രതിജ്ഞ ചെയ്യുമ്പോഴും വന്ദേമാതരം ആലപിച്ചിരുന്നു. വന്ദേമാതരം, ദേശീയ ഗാനം, തമിഴ് തായ് വാഴ്ത്ത് എന്ന ക്രമത്തിലായിരുന്നു അവിടെ ആലാപനം. എന്നാൽ തമിഴ് ഗീതത്തിന് മുൻപായി വന്ദേമാതരം ആലപിച്ചത് 'തമിഴ് തായ് വാഴ്ത്തി'നെ ഇകഴ്ത്തുന്നതിന് തുല്യമാണെന്ന് ആരോപിച്ച് തമിഴ്നാട്ടിൽ വലിയ വിമർശനം ഉയർന്നിരുന്നു.
അതേസമയം, പശ്ചിമ ബംഗാൾ മുഖ്യമന്ത്രി സുവേന്ദു അധികാരിയുടെ സത്യപ്രതിജ്ഞാ ചടങ്ങിൽ വന്ദേമാതരം ആലപിച്ചിരുന്നില്ല എന്നത് ശ്രദ്ധേയമാണ്. പ്രധാനമന്ത്രി നരേന്ദ്ര മോദിയും കേന്ദ്ര ആഭ്യന്തര മന്ത്രി അമിത് ഷായും ആ ചടങ്ങിൽ പങ്കെടുത്തിട്ടുപോലും അവിടെ കേന്ദ്ര നിർദേശം പാലിക്കപ്പെട്ടിരുന്നില്ല.