ഓൺലൈൻ ഭക്ഷണ വിതരണ ശൃംഖലയായ സൊമാറ്റോ പേരുമാറ്റത്തിനൊരുങ്ങുന്നു. മാതൃകമ്പനിയുടെ പേര് സൊമാറ്റോയിൽ നിന്ന് എറ്റേണൽ എന്നാക്കുന്നതിന് കമ്പനി ഡയറക്ടർ ബോർഡ് അംഗീകാരം നൽകി. കമ്പനി പേര് മാറുമെങ്കിലും ഭക്ഷണവിതരണത്തിനുള്ള സംവിധാനം സൊമാറ്റോ എന്ന പേരിൽ തന്നെ തുടരും. കമ്പനി സി.ഇ.ഒ ദീപിന്ദർ ഗോയൽ ഇക്കാര്യം സ്ഥിരീകരിച്ചിട്ടുണ്ട്.വ്യാഴാഴ്ച്ച രാത്രിയാണ് കമ്പനി പുതിയ മാറ്റം പ്രഖ്യാപിച്ചത്. പുതിയ ലോഗോയും ഇതിനൊപ്പം അവതരിപ്പിച്ചിട്ടുണ്ട്.
എറ്റേണൽ എന്ന മാതൃകമ്പനിയുടെ കീഴിൽ നാല് കമ്പനികളാണുള്ളത്. ഫുഡ് ഡെലിവറി പ്ലാറ്റ്ഫോമായ സൊമാറ്റ, ക്വിക്ക് കൊമേഴ്സ് കമ്പനി ബ്ലിങ്കിറ്റ്, മൂവീസ്, ഇവന്റ് എന്നിവയ്ക്കായുള്ള ബുക്കിങ് ആപ്പായ ഡിസ്ട്രിക്ട്, ബിസിനസ് ടു ബിസിനസ് ഗ്രോസറി സപ്ലൈ ആയ വെർട്ടിക്കൽ ഹൈപ്പർപ്യുർ എന്നിവയാണത്. കമ്പനിയുടെ കോർപ്പറേറ്റ് വെബ്സൈറ്റിലും സൊമാറ്റോയ്ക്ക് പകരം എറ്റേണൽ എന്ന പേരാണുണ്ടാവുക.
പേരുമാറ്റം സംബന്ധിച്ച നടപടികൾ പൂർത്തിയായാൽ ഓഹരി ലിസ്റ്റിങ്ങിൽ സൊമാറ്റോയുടെ പേര് എറ്റേണൽ എന്നാവും കാണിക്കുക. ഡിസംബറിൽ ബോംബെ ഓഹരി വിപണിയിൽ സൊമാറ്റോ ലിസ്റ്റ് ചെയ്തതിന് പിന്നാലെയാണ് കമ്പനിയുടെ പേരുമാറ്റവും ഉണ്ടാവുന്നത്. കമ്പനി ഈ വർഷം 17ാം വാർഷികവും ആഘോഷിക്കുകയാണ്.ഓഹരി ഉടമകൾ മാറ്റം അംഗീകരിച്ചുകഴിഞ്ഞാൽ, കമ്പനി അതിൻ്റെ കോർപ്പറേറ്റ് വെബ്സൈറ്റ് zomato.comൽ നിന്ന് eternal.comലേക്ക് മാറ്റും