അക്കൗണ്ടിൽ സൈൻ ഇൻ ചെയ്താൽ തുടർന്നും ചാറ്റും കോൺടാക്ടുകളും ലഭ്യമാകുമെന്ന് എക്സിലൂടെ മൈക്രോസോഫ്റ്റ് അറിയിച്ചു
വീഡിയോ കോൾ എന്ന അനുഭവം ലോകത്തിന് ആദ്യമായി പരിചയപ്പെടുത്തുകയും തുടർന്ന് പ്രശസ്തമാകുകയും അതിനുശേഷം മറ്റൊരു മൾട്ടി നാഷണൽ കമ്പനി ഏറ്റെടുക്കപ്പെട്ടുകയും ചെയ്ത സമൂഹമാധ്യമം നിലവിലെ അതിൻറെ ഉടമസ്ഥർ അടച്ചു പൂട്ടാൻ ഒരുങ്ങുന്നു.
മൈക്രോസോഫ്റ്റിന്റെ വീഡിയോ കോളിങ് സംവിധാനമായ സ്കൈപ്പ് സേവനം അവസാനിപ്പിക്കുന്നു. ദശലക്ഷക്കണക്കിന് ഉപയോക്താക്കളുള്ള സ്കൈപ്പ് മേയ് മാസത്തോടെ നിർത്തുമെന്നാണ് റിപ്പോർട്ട്. ഉപയോക്താക്കൾക്ക് മൈക്രോസോഫ്റ്റ് ടീംസ് (മൈക്രോസോഫ്റ്റ് വികസിപ്പിച്ചെടുത്ത, ചില ആപ്പുകൾ ഒരുമിച്ച് ലഭ്യമാകുന്ന സംവിധാനം) അക്കൗണ്ടിൽ സൈൻ ഇൻ ചെയ്താൽ തുടർന്നും ചാറ്റും കോൺടാക്ടുകളും ലഭ്യമാകുമെന്ന് എക്സിലൂടെ മൈക്രോസോഫ്റ്റ് അറിയിച്ചു.
ലോകത്തിലെ ആദ്യ വിഡിയോ കോണ്‍ഫറന്‍സിങ് സംവിധാനങ്ങളിലൊന്നായ സ്കൈപ് 2003ലാണ് ലോഞ്ച് ചെയ്തത്. നിക്ലാസ് സെൻസ്ലോം, ജാനസ് ഫ്രീസ് എന്നീ സംരംഭകരായിരുന്നു സ്കൈപ് പ്ലാറ്റ്‌ഫോമിന്‍റെ ശില്‍പികള്‍. വീഡിയോ കോണ്‍ഫറന്‍സ്, വോയിസ് കോള്‍, ഇന്‍സ്റ്റന്‍റ് മെസേജിങ്, ഫയല്‍ ട്രാന്‍സ്‌ഫര്‍ തുടങ്ങിയ സേവനങ്ങളാണ് സ്കൈപ് ഉപയോക്താക്കള്‍ക്ക് നല്‍കുന്നത്. ഡെസ്‌ക്ടോപ്പ്, മൊബൈല്‍ വേര്‍ഷനുകളില്‍ പ്ലാറ്റ്ഫോം ലഭ്യമാണ്.
2003-ൽ പ്രവർത്തനം ആരംഭിച്ച് സ്കൈപ്പിനെ 2011-ലാണ് മൈക്രോസോഫ്റ്റ് സ്വന്തമാക്കിയത്. വാട്ട്സാപ്പ്, ഫെയ്സ്ബുക്ക് മെസഞ്ചർ പോലുള്ളവ പ്രചാരത്തിൽ വന്നതോടെ സ്കൈപ്പിന്റെ ജനപ്രീതി കുറഞ്ഞു. 2017-ൽ മൈക്രോസോഫ്റ്റ് സ്കൈപ്പിന് ചില മാറ്റങ്ങൾ വരുത്തിയെങ്കിലും ഫലംകണ്ടില്ല. സ്കൈപ്പിന്റെ എതിരാളികളായ സ്നാപ്പ്ചാറ്റിന് സമാനമായ മാറ്റങ്ങളാണ് അന്ന് കൊണ്ടുവന്നിരുന്നത്. 2021 ആയതോടെ സ്കൈപ്പ് അതിന്റെ സേവനങ്ങൾ അവസാനിപ്പിക്കാൻ പോകുകയാണെന്ന ഊഹാപോഹങ്ങൾ പടർന്നു.
സ്കൈപ്പിന്റെ അടച്ചുപൂട്ടൽ പ്രഖ്യാപനം വന്നതോടെ മൈക്രോസോഫ്റ്റ് കമ്പനിയുടെ കൊളാബറേറ്റീവ് ആപ്പ്സ് ആൻഡ് പ്ലാറ്റ്ഫോംസ് പ്രസിഡന്റിന്റെ ചുമതല നിർവഹിച്ചിരുന്ന ജെഫ് ടെപ്പറിന്റെ ഒരു ബ്ലോഗ് പോസ്റ്റും കമ്പനി പങ്കുവെച്ചിട്ടുണ്ട്. മൈക്രോസോഫ്റ്റ് ടീംസിന് പ്രാധാന്യം നൽകുന്ന പ്രവർത്തനങ്ങളാണ് ഇനിയുണ്ടാവുക എന്ന് ബ്ലോഗ് പോസ്റ്റിൽ പറയുന്നു. 'മൈക്രോസോഫ്റ്റ് ടീംസിലൂടെ ഉപയോക്താകൾക്ക് സ്കൈപ്പിൽ അവർ ഉപയോഗിച്ചിരുന്ന സേവനങ്ങൾ ലഭ്യമാകും. ഗ്രൂപ്പ് കോൾ, വൺ ഓൺ വൺ കോൾ, മെസേജ്, ഫയൽ ഷെയറിങ് തുടങ്ങിയവ എല്ലാം ലഭ്യമാകും', ജെഫ് ടെപ്പർ ബ്ലോഗ് പോസ്റ്റിൽ പറയുന്നു.
കോവിഡ് മഹാമാരിക്കിടയിൽ വർക്ക് ഫ്രം ഹോം സംവിധാനം വന്നതോടെ മൈക്രോസോഫറ്റ് ടീംസിന് വലിയ ജനപ്രീതിയുണ്ടാക്കാൻ സാധിച്ചതായും വിലയിരുത്തപ്പെടുന്നു.
സ്കൈപ്പിന്റെ ചില സേവനങ്ങൾക്ക് പണം നൽകിയവർക്ക് അതിന്റെ കാലാവധി അവസാനിക്കുന്നതുവരെ സേവനങ്ങൾ ലഭ്യമാക്കുമെന്നും മൈക്രോസോഫ്റ്റ് അറിയിച്ചു. സ്കൈപ്പ് സേവനം അവസാനിപ്പിക്കുന്നതോടെ രണ്ട് നിർദേശങ്ങളാണ് മൈക്രോസോഫ്റ്റ് ഉപയോക്താകൾക്കായി മുന്നോട്ടുവെയ്ക്കുന്നത്. ഒന്ന് മൈക്രോസോഫ്റ്റ് ടീംസിലേക്ക് മാറുക, അല്ലെങ്കിൽ സ്കൈപ്പ് ഡേറ്റ എല്ലാം എക്സ്പോർട്ട് ചെയ്ത് സൂക്ഷിക്കുക.
#skype #microsoft #videoconference