 |
| പ്രതീകാത്മക ചിത്രം |
ദിവസേനയുള്ള നടത്തം ശാരീരികാരോഗ്യം നിലനിർത്തുന്നതിൽ വലിയ പങ്കാണ് വഹിക്കുന്നത്. നടത്തം ശീലമാക്കുന്നതിലൂടെ ജീവിതശൈലീരോഗങ്ങളേയും അകാലമരണത്തേയും വിഷാദരോഗത്തേയുമൊക്കെ പ്രതിരോധിക്കാനാവുമെന്ന് പലപഠനങ്ങളും തെളിയിച്ചിട്ടുണ്ട്.
നടത്തവും കാൻസറും തമ്മിലുള്ള ബന്ധം വ്യക്തമാക്കുന്നൊരു പഠനമാണ് പുതിയതായി പുറത്തുവന്നിരിക്കുന്നത്. നടത്തം ശീലമാക്കുന്നതിലൂടെ കാൻസറിനെ പ്രതിരോധിക്കാനാവുമെന്നാണ് പഠനത്തിൽ കണ്ടെത്തിയത്.
ഓക്സ്ഫഡ് (Oxford University) സർവകലാശാലയിലെ ഗവേഷകരാണ് പഠനം നടത്തിയത്. ദിവസവും നടക്കുന്നതിലൂടെ പതിമൂന്നിനം കാൻസറുകളുടെ സാധ്യത കുറയ്ക്കുമെന്നാണ് പഠനത്തിൽ കണ്ടെത്തിയത്. യു.കെ.യിലെ 85,000 പേരുടെ ആരോഗ്യവിവരങ്ങൾ ശേഖരിച്ചാണ് പഠനം നടത്തിയത്. ആറുവർഷത്തോളം പഠനത്തിൽ പങ്കാളികളായവരെ നിരീക്ഷിച്ചതിനുശേഷമാണ് വിലയിരുത്തലിലെത്തിയത്.
എത്രത്തോളം നടക്കുന്നോ, അത്രത്തോളം കാൻസർ സാധ്യതയും കുറയുമെന്നാണ് ഗവേഷകർ വ്യക്തമാക്കുന്നത്. ദിവസവും കുറഞ്ഞത് അയ്യായിരം ചുവടെങ്കിലും നടക്കുന്നവരിലാണ് ഗുണം ലഭിക്കുക. ഏഴായിരം ചുവടുകൾ നടക്കുന്നതിലൂടെ കാൻസർ സാധ്യത പതിനൊന്ന് ശതമാനമായും 9000 ചുവടുകൾ നടക്കുന്നതിലൂടെ പതിനാറ് ശതമാനമായും കുറയ്ക്കാമെന്ന് ഗവേഷകർ പറയുന്നു. 9000-ൽ കൂടുതൽ ചുവടുകൾ നടക്കുന്നത് വീണ്ടും ആരോഗ്യം മെച്ചപ്പെടുത്താൻ സഹായിക്കുമെന്നും ഗവേഷകർ പറയുന്നു. ശരീരത്തിന് ആവശ്യമായതത്രെ നടക്കുന്നു എന്ന് ഉറപ്പാക്കേണ്ടതാണ് അല്ലാതെ എത്ര തീവ്രമായി നടക്കുന്നു എന്നല്ല ഇതുകൊണ്ട് ഉദ്ദേശിക്കുന്നതെന്ന് ഗവേഷകർ പറയുന്നു.
കൂടാതെ ദീർഘസമയം ഇരിക്കുന്നതിന് പകരം മിതമായ ശാരീരിക പ്രവർത്തനങ്ങളിൽ ഏർപ്പെടുന്നതും കാൻസറിനെ പ്രതിരോധിക്കാൻ സഹായിക്കുമെന്ന് ഗവേഷകർ പറയുന്നു. കരൾ, ശ്വാസകോശം, വൃക്ക, എൻഡോമെട്രിയൽ, കുടൽ, ഹെഡ്&നെക്ക്, മൂത്രാശയം, സ്തനം തുടങ്ങിയ കാൻസറുകളെ പ്രതിരോധിക്കുന്നതിലാണ് നടത്തത്തിന്റെ പങ്കിനേക്കുറിച്ച് ഗവേഷകർ പഠനം നടത്തിയത്.
ദിവസവും കുറഞ്ഞത് പതിനായിരം ചുവടെങ്കിലും വെക്കുന്നത് ശരീരത്തിന്റെ മൊത്തത്തിലുള്ള ആരോഗ്യത്തിന് ഗുണകരമാണെന്നാണ് ഇതുവരെ പറഞ്ഞിരുന്നതെങ്കിൽ ഇനി അതിന്റെ കൂടെ കാൻസർ പ്രതിരോധത്തിനും കൂടി ഗുണംചെയ്യുമെന്നാണ് ഗവേഷകർ അധികമായി പറയുന്നത്.
ചില നിർദ്ദേശങ്ങൾ ;
രണ്ടിലധികം നിലകളുള്ള കെട്ടിടത്തിന്റെ മുകളിലൊക്കെ കയറുമ്പോൾ രണ്ടാം നില വരെയെങ്കിലും ലിഫ്റ്റ് കൂടാതെ തനിയെ നടന്നു കയറാൻ ശ്രമിക്കുക.
മൊബൈൽ ഫോൺ വഴിയാണ് സംസാരിക്കുന്നതെങ്കിൽ ഒരിടത്ത് ഇരിക്കാതെ പകരം നടന്നുകൊണ്ട് സംസാരിക്കാൻ ശ്രമിക്കുക, ഇതുവഴി വിളിയും നടക്കും 'നടത്തവും'നടക്കും.
നിശ്ചിത ഇടവേളകളിൽ ഓരോ മണിക്കൂറും നടക്കാൻ ശ്രമിക്കുക. എത്രനേരം വേണം എത്ര ദൂരം നടക്കണം എന്നൊക്കെ സൗകര്യം പോലെ തീരുമാനിക്കാം.
പുറത്തുപോകുമ്പോൾ വാഹനങ്ങൾ ഒഴിവാക്കി പോകാൻ പറ്റാവുന്ന അത്രയും ദൂരം നടന്നു തന്നെ പോവുക. ഇതുകൊണ്ട് നടക്കുകയും ചെയ്യാം, സമൂഹമായിട്ട് ബന്ധപ്പെടുന്നതിനുള്ള ഒരു മനസ്ഥിതി ഉണ്ടാവുകയും ചെയ്യും.
#health #lifestyle #cancer