ജോലി ചെയ്യാൻ മടിയുള്ളവർക്ക് ഓണത്തിന് സദ്യയൊരുക്കി (Onasadya) തളരേണ്ടാ. പരിപ്പും പപ്പടവും സാമ്പാറും അവിയലും അച്ചാറും തോരനുമെല്ലാമുള്ള സദ്യ കുടുംബശ്രീ വീടുകളിലെത്തിക്കും. കുടുംബശ്രീ സദ്യ തയ്യാറാക്കുന്നത് രണ്ടു പായസമുൾപ്പെടെ 18 ഇനങ്ങളുണ്ടാകും.
മുൻകൂട്ടിയുള്ള ഓർഡറുകൾക്കനുസരിച്ചാകും കുടുംബശ്രീ സദ്യ എത്തിച്ചു നൽകുന്നത്. ബ്ലോക്ക് അടിസ്ഥാനത്തിലാണ് തയ്യാറാക്കുന്നത്. ഒരു ബ്ലോക്കിൽ രണ്ടു സിഡിഎസുകൾക്കാണ് ചുമതല. ആലപ്പുഴ ജില്ലയിൽ 12 ബ്ലോക്കുകളിലായി 25 യൂണിറ്റുകളാണ് സദ്യയൊരുക്കുക.
പട്ടണക്കാട്, എഴുപുന്ന, തൈക്കാട്ടുശ്ശേരി, പള്ളിപ്പുറം, കഞ്ഞിക്കുഴി, തണ്ണീർമുക്കം, മണ്ണഞ്ചേരി, മാരാരിക്കുളം സൗത്ത്, നെടുമുടി, ചമ്പക്കുളം, വെളിയനാട്, മുട്ടാർ, പുന്നപ്ര സൗത്ത്, പുറക്കാട്, തൃക്കുന്നപ്പുഴ, ചെറുതന, ചെറിയനാട്, മുളക്കുഴ, തെക്കേക്കര, മാവേലിക്കര യുഎൽബി, താമരക്കുളം, പാലമേൽ, ആറാട്ടുപുഴ, കായംകുളം പടിഞ്ഞാറ്, പത്തിയൂർ എന്നീ സിഡിഎസുകളിൽനിന്നാണ് വിതരണം.
ഒരാൾക്ക് 200 രൂപയിൽ താഴെയാകും നിരക്ക്. കൃത്യമായ വില വരുംദിവസങ്ങളിൽ നിശ്ചയിക്കുമെന്ന് ജില്ലാ മിഷൻ കോഡിനേറ്റർ എസ്. രഞ്ജിത്ത് പറഞ്ഞു. പായസം മാത്രമായും വിൽക്കും. ഒരു ലിറ്ററർ എങ്കിലുമുള്ള ഓർഡറുകളായിരിക്കണം. സേമിയ, അട, പരിപ്പ് എന്നിവയാണുണ്ടാകുക. കൂടാതെ മിക്സ്ചർ പായസവും ഉണ്ടാകും. ഇതിനു ലിറ്ററിന് 150 രൂപയാണ് വില.
#kudumbashree