ഒറ്റനോട്ടത്തിൽ നിഷ്കളങ്കമെന്ന് തോന്നിപ്പിക്കുന്ന വിനോദത്തിന് പിന്നിൽ വലിയ ഭീഷണികൾ ഒളിഞ്ഞിരിപ്പുണ്ട്, അത് പിന്നീട് ദോഷം ചെയ്യാം.
സമൂഹമാധ്യമങ്ങളിൽ ഇപ്പോൾ 'എഐ കാരിക്കേച്ചർ' (AI Caricature) ചിത്രങ്ങൾ തരംഗമായി മാറിക്കൊണ്ടിരിക്കുകയാണ്. സാധാരണക്കാർ മുതൽ മന്ത്രിമാരും പ്രമുഖ വ്യക്തികളും വരെ തങ്ങളുടെ ഫോട്ടോകൾ ചാറ്റ് ജിപിടി (ChatGPT) പോലുള്ള എഐ പ്ലാറ്റ്ഫോമുകൾ വഴി കാരിക്കേച്ചറുകളാക്കി മാറ്റി 'ട്രെൻഡിങ്ങിനൊപ്പം' എന്ന ഹാഷ്ടാഗോടെ പങ്കുവെക്കുന്നു. എന്നാൽ, ഒറ്റനോട്ടത്തിൽ നിഷ്കളങ്കമെന്ന് തോന്നിപ്പിക്കുന്ന ഈ വിനോദത്തിന് പിന്നിൽ വലിയ രീതിയിലുള്ള സുരക്ഷാ ഭീഷണികൾ (Cybersecurity Threats) ഒളിഞ്ഞിരിപ്പുണ്ടെന്ന് സൈബർ വിദഗ്ധർ മുന്നറിയിപ്പ് നൽകുന്നു.
വെറുമൊരു ഫോട്ടോ എഡിറ്റിംഗിന് അപ്പുറം, വ്യക്തിയുടെ ജോലി, ഹോബികൾ, സ്വഭാവ സവിശേഷതകൾ എന്നിവ കൂടി നൽകിയാണ് എഐ ഇത്തരം ചിത്രങ്ങൾ നിർമ്മിക്കുന്നത് എന്നതാണ് ഇതിലെ പ്രധാന ആശങ്ക. വിദ്യാഭ്യാസ മന്ത്രി വി.ശിവൻകുട്ടി, ഗതാഗത മന്ത്രി ഗണേഷ് കുമാർ ഉൾപ്പെടെയുള്ളവരുടെ കാരിക്കേച്ചർ സമൂഹമാധ്യമങ്ങളിൽ (Social Media) വലിയ ശ്രദ്ധ പിടിച്ചു പറ്റിയിരുന്നു.
ഇത്തരം ട്രെൻഡുകൾ വലിയ അപകടങ്ങൾക്ക് വഴിവെച്ചേക്കാമെന്ന് ടെക്നോബെസ് (Technobezz) പോലുള്ള അന്താരാഷ്ട്ര ടെക് റിപ്പോർട്ടുകൾ ചൂണ്ടിക്കാട്ടുന്നു. മികച്ചൊരു ചിത്രം ലഭിക്കുന്നതിനായി ഉപയോക്താക്കൾ തങ്ങളുടെ കുടുംബം, ജീവിതരീതി, ജോലി തുടങ്ങിയ സ്വകാര്യ വിവരങ്ങൾ എഐക്ക് കൈമാറുന്നു. ഒരു ചിത്രത്തോടൊപ്പം ഇത്രയധികം വ്യക്തിഗത വിവരങ്ങൾ നൽകുമ്പോൾ, നിങ്ങളുടെ ഡിജിറ്റൽ വ്യക്തിത്വം (Digital Identity) വിശകലനം ചെയ്യാൻ എഐക്ക് എളുപ്പത്തിൽ സാധിക്കുന്നു. മുഖത്തിന്റെ കൃത്യമായ അളവുകളും സവിശേഷതകളും എഐ വിശകലനം ചെയ്യുന്നത് ഭാവിയിൽ Deepfake (ഡീപ് ഫേക്ക്) വീഡിയോകൾ നിർമ്മിക്കാനും ആൾമാറാട്ടം (Impersonation) നടത്താനും ദുരുപയോഗം ചെയ്യപ്പെടാൻ സാധ്യതയുണ്ട്.
കൂടാതെ, ഉപയോക്താക്കൾ പോലുമറിയാതെ അവരുടെ സ്വഭാവത്തെയും ജീവിതത്തെയും കുറിച്ചുള്ള ഒരു കൃത്യമായ രൂപരേഖ നിർമ്മിക്കാൻ കമ്പനികൾക്ക് ഇത് സഹായകരമാകും. ഭാവിയിൽ കമ്പനിയുടെ സ്വകാര്യതാ നയങ്ങളിൽ (Privacy Policies) മാറ്റം വന്നാൽ, ഈ ഡാറ്റ നിങ്ങളെ ലക്ഷ്യം വെച്ചുള്ള പരസ്യങ്ങൾക്കോ (Targeted Ads) മറ്റ് ബിസിനസ്സ് ആവശ്യങ്ങൾക്കോ ഉപയോഗിക്കപ്പെട്ടേക്കാം. ഒരിക്കൽ ഇന്റർനെറ്റിൽ പങ്കുവെക്കപ്പെടുന്ന വിവരങ്ങൾ എന്നെന്നേക്കുമായി അവിടെ അവശേഷിക്കുന്നു എന്ന യാഥാർത്ഥ്യം ഉണ്ടെന്ന് തിരിച്ചറിയണം. അതിനാൽ, ഇത്തരം ട്രെൻഡുകളിൽ പങ്കുചേരുമ്പോൾ വ്യക്തിഗത വിവരങ്ങൾ പരമാവധി നൽകാതിരിക്കാനും ഡിജിറ്റൽ സുരക്ഷയ്ക്ക് (Digital Privacy) മുൻഗണന നൽകാനും ശ്രദ്ധിക്കണമെന്ന് സൈബർ സുരക്ഷാ വിദഗ്ധർ ഓർമ്മിപ്പിക്കുന്നു.
സുരക്ഷിതമായി ഈ ടൂളുകൾ ഉപയോഗിക്കാനുള്ള മാർഗ്ഗങ്ങൾ :
1. ചിത്രത്തിൽ വരുത്തേണ്ട മാറ്റങ്ങൾ
* പശ്ചാത്തലം മാറ്റുക: വീട്, ഓഫീസ് തുടങ്ങിയ സ്വകാര്യ സ്ഥലങ്ങൾ വെളിപ്പെടുത്താത്ത പ്ലെയിൻ പശ്ചാത്തലമുള്ള ചിത്രങ്ങൾ ഉപയോഗിക്കുക.
* മെറ്റാഡാറ്റ (Metadata) ഒഴിവാക്കുക: ഒറിജിനൽ ഫോട്ടോയ്ക്ക് പകരം അതിന്റെ ഒരു സ്ക്രീൻഷോട്ട് ഉപയോഗിക്കുക. ഇത് ചിത്രത്തിലെ ലൊക്കേഷൻ, സമയം എന്നീ വിവരങ്ങൾ നീക്കം ചെയ്യാൻ സഹായിക്കും.
* തിരിച്ചറിയൽ അടയാളങ്ങൾ: യൂണിഫോം, ഐഡി കാർഡ്, വാഹന നമ്പർ എന്നിവ ചിത്രത്തിലുണ്ടെങ്കിൽ അവ മറയ്ക്കുകയോ ക്രോപ്പ് ചെയ്യുകയോ ചെയ്യുക.
* ലോ-റെസല്യൂഷൻ ചിത്രങ്ങൾ: അമിത വ്യക്തതയുള്ള (HD) ചിത്രങ്ങൾ ഒഴിവാക്കി അത്യാവശ്യം ക്വാളിറ്റിയുള്ളവ മാത്രം നൽകുക.
2. വിവരങ്ങൾ നൽകുമ്പോൾ ശ്രദ്ധിക്കാൻ
* സ്വകാര്യ വിവരങ്ങൾ പരിമിതപ്പെടുത്തുക: ഫോൺ നമ്പർ, കൃത്യമായ ജോലിസ്ഥലം, വീട്ടുപേര് എന്നിവ ഒഴിവാക്കുക. "യാത്രകൾ ഇഷ്ടപ്പെടുന്ന ഒരാൾ" എന്നിങ്ങനെ പൊതുവായ വിവരങ്ങൾ മാത്രം നൽകുക.
* മറ്റുള്ളവരുടെ സുരക്ഷ: കുടുംബാംഗങ്ങളുടെയോ കുട്ടികളുടെയോ ചിത്രങ്ങൾ അവരുടെ അനുവാദമില്ലാതെ ഇത്തരം പ്ലാറ്റ്ഫോമുകളിൽ നൽകാതിരിക്കുക.
3. പ്രൈവസി സെറ്റിങ്സിലെ മാറ്റങ്ങൾ
* Data Training off : chat GPT പോലുള്ള എ ഐ ആപ്പുകളിൽ 'Settings > Data Controls' എന്നതിൽ ക്ലിക്ക് ക്ലിക്ക് ചെയ്തതിനുശേഷം Chat History & Training ഓഫ് ചെയ്യുക.
* ആപ്പ് പെർമിഷനുകൾ: ഗാലറിയിലെ എല്ലാ ചിത്രങ്ങളും കാണാനുള്ള അനുവാദം നൽകാതെ, 'Limited Access' വഴി ആവശ്യമുള്ള ചിത്രം മാത്രം സെലക്ട് ചെയ്യുക. ലൊക്കേഷൻ, കോൺടാക്റ്റ് പെർമിഷനുകൾ നിഷേധിക്കുക.
* ലോഗിൻ സുരക്ഷ: സോഷ്യൽ മീഡിയ അക്കൗണ്ടുകൾ (Google/Facebook) വഴി ലോഗിൻ ചെയ്യാതെ, ഒരു പ്രത്യേക ഇമെയിൽ ഐഡി ഉപയോഗിക്കുക.
* അക്കൗണ്ട് ഡിലീറ്റ് ചെയ്യുക: കാരിക്കേച്ചർ നിർമ്മിച്ച് കഴിഞ്ഞാലുടൻ ആ പ്ലാറ്റ്ഫോമിലെ അക്കൗണ്ടോ ഡാറ്റയോ ഡിലീറ്റ് ചെയ്യുന്നത് വിവരങ്ങൾ അവിടെ അവശേഷിക്കുന്നത് ഒഴിവാക്കാൻ സഹായിക്കും.
ഓർക്കുക: ഒരിക്കൽ ഇന്റർനെറ്റിൽ പങ്കുവെക്കപ്പെടുന്ന വിവരങ്ങൾ എന്നെന്നേക്കുമായി അവിടെ അവശേഷിക്കുന്നു. വ്യക്തിഗത വിവരങ്ങൾ പരമാവധി നൽകാതിരിക്കാനും ഡിജിറ്റൽ സുരക്ഷയ്ക്ക് മുൻഗണന നൽകാനും ശ്രദ്ധിക്കണമെന്ന് സൈബർ വിദഗ്ധർ ഓർമ്മിപ്പിക്കുന്നു.
(പ്രതീകാത്മക ചിത്രം എ ഐ നിർമ്മിതം)
More readAl ആപ്പുകളിൽ ഫോട്ടോ അപ്ലോഡ് ചെയ്യുന്നതിന് മുൻപ് : വിൻ്റേജ് ട്രെൻഡിന് പിന്നിൽ?